Në finalen e Conference League në Tiranë mund të kemi një trajner të madh si Jose Mourinho por edhe pak aromë shqiptare me Marash Kumbullën. Sot Roma arriti gjysmëfinalen e kompeticionit të ri ku finalja do të jetë në “Air Albania” teksa përballë pati “armiqtë” e Bodo të cilët i shpartalloi 4-0.
Marash Kumbulla ishte sonte në stol por verdhekuqtë dominuan totalisht ekipin që i ka mposhtur 2 herë këtë sezon duke marrë hak për ato disfata.
Ishte mbrëmja e Nicolo Zaniolos që bën ndeshjen më të mirë të sezonit me një tripletë por shërbeu goli i shpejtë i Abraham për të ndezur sfidën që në minutën e 5. Në fund një fitore e thellë dhe në gjysmëfinale tashmë Roma do të ketë Leicester City.
Në anën tjetër, Feyenoordi siguroi gjysmëfinalen e Conference League pasi mundi me rezultatin 3-1 Slavia Prague në Çeki ku sfida e parë u mbyll 3-3. Do të ketë më tej përballë Marseille të cilët fituan në një stadium elektrizues si ai i Paok me rezultatin 1-0.
