Dy ditë më parë, Departamenti i Thesarit i Shteteve të Bashkuara të Amerikës shpalli sanksione ndaj ish-deputetit socialist Aqif Rakipi.
Rakipi përshkruhet si një ish-deputet famëkeq nga Elbasani, me ndikim të dëmshëm dhe destabilizues në proceset politike në Shqipëri. “Rakipi ka qenë prej kohësh i përfshirë në krimin e organizuar”, thuhet në njoftim, ku shtohet se ish-deputeti ka ushtruar ndikim të paligjshëm për të emëruar zyrtarë publikë në Elbasan dhe në Tiranë.
Por cili është komenti dhe rruga që do të ndjekë ai tani?
Për “5pyetjet.al”, Rakipi u shpreh se pas vendimit ka gisht Lulzim Basha.
Intervista
A keni një koment për sanksionet e SHBA-së?
Aqif Rakipi: Nuk kam asnjë koment. As kam lidhje me atë pjesë fare.
A do ta ndiqni në hapa ligjorë?
Aqif Rakipi: Do ta shoh. Nuk kam asnjë lloj gjëje nga ata që thuhen. Të shohin a kam llogari bankare në Amerikë, a bëj biznes. Nuk kam biznes këtu dhe jo më andej.
SHBA ju cilëson si “ish-deputet famëkeq”, a do të kërkoni prova, ku bazohet?
Aqif Rakipi: Do i shoh.
Nuk do të nisni një proces gjyqësor?
Aqif Rakipi: Do të shikoj cfarë do të bëj. Do të interesohem.
A mendoni se është politike?
Aqif Rakipi: Po.
Po kë fajësoni?
Aqif Rakipi: Lul Basha e ka merakun.
Mendoni se është goditje nga Basha?
Aqif Rakipi: As që bëhet llaf.
Aqif Rakipi e humbi mandatin e deputetit në vitin 2018 si pasojë e ligjit të dekriminalizimit. Por në zgjedhjet e fundit parlamentare të zhvilluara më 25 prill 2021, djali i tij, Ornaldo Rakipi u zgjodh deputet i Partisë Socialiste në Tiranë, duke thyer herësin.
