Dy ngjarje të rënda kriminale tronditën vendin këtë të Martë, duke rritur ndjenjën e pasigurisë për jetën te qytetarët.
E para rreth orës 08:15 në Shkodër, ku breshëria e plumbave la të vdekur 55-vjeçarin Nazmi Bandula. Nga mënyra e ekzekutimit, krijohen dyshime se atentati ka qenë i mirëmenduar dhe autorët profesionistë. Edhe këtë herë, siç ndodh rëndom, janë larguar në drejtim të paditur. Ngjarja megjithatë, mund të ishte me një bilanc më të rënduar, pasi 55-vjeçari i ekzekutuar, me precedentë të mëparshëm, ishte në tavolinë me një tjetër person në momentet e të shtënave. Në lokalin e vogël në lagjen “Partizani” ndodhej edhe punonjësi i biznesit. Të dy, arritën ti shpëtonin plumbave.
Rreth katër orë më vonë nga vrasja në kryeqendrën e veriut, një tjetër krim i llahtarshëm ndodhi në fshatin e vogël Vidhishtë të Roskovecit. Xhevair Hoxha, 61 vjeç goditi me thikë partneren e djalit të tij, Merushe Hazizi, 30 vjeçe dhe më pas vari veten në një pemë pas banese. Motivi? Nuk ishte dakord për lidhjen e të birit me të rëndë, pasi ajo kishte qenë e martuar më herët, martesë nga e cila kishte edhe tre fëmijë.
Krime të rënda që shokojnë teksa jetojmë në një kohë kur qytetarët janë të frikësuar për të ardhmen e tyre, në një vend që pak shpresë të ofron për një të ardhme më të mirë. Rritja e çmimeve, pagat e ulëta, mungesa e shërbimeve për të cilat paguan taksa, e pambarimisht halle që detyrojnë më pas shqiptarët të largohen masivisht larg Atdheut. Ndërsa për të tjerët që nuk ia arrijnë qëllimi mbretet po ai: arratisja nga një vend sa i bekuar për pasuritë natyrore aq edhe i mallkuar për nga mënyra se si qeveriset, me afera që trembin po aq llahtarshëm sa dhe vrasjet që marrin jetë.
E ndërsa krimi shfaq kthetrat frikshëm dhe jeta vështirësohet, udhëheqësi Edi Rama, i kapardisur nga Berlini, përrallis se qeveria e tij ka plotësuar kushtet për hapjen e negociatave qysh tre a katër vite më parë.
