Pesëmbëdhjetë persona kanë rënë në pranga dhe 6 të tjerë janë shpallur në kërkim, pasi akuzohen se tregtonin produkte të ndryshme të cilat ishin futur kontrabandë në vend dhe nuk jepnin faturë tatimore për shitjet e tyre.
Këtë aktivitet, ata e zhvillonin nëpërmjet faqeve online në rrjete sociale. Ndaj 15 të arrestuarve, është ekzekutuar masa e sigurisë “Arrest në burg”. Gjashtë të tjerë ndërkohë, janë ende në kërkim.
Në cilësinë e provës materiale janë sekuestruar sasi të konsiderueshme produktesh (mallrash), të cilat do të tregtoheshin te klientët nëpërmjet postave, njoftoi policia.
Ndaj personave të akuzuar rëndojnë akuzat për veprat penale “Kontrabanda me mallra të tjera”, “Fshehja e të ardhurave”, “Mospagimi i taksave dhe tatimeve”, dhe “Shkelja e të drejtave të pronësisë industriale”.
