Ish-shefi i AKI-së, Smakaj deklaroi se Shërbimi Sekret serb kishte tentuar që ta vrasin ish-presidentin e vendit, Hashim Thaçi. Smakaj tha se tentim-vrasja ndaj Thaçit ishte bërë më 2014.
Në atë kohë, Thaçi, po ushtronte postin e kryeministrit të Kosovës, pra në periudhën 2011-2014.
“Institucionet e sigurisë kanë qenë shumë të përgatitura për këto lojëra në territorin e Kosovës. Ju kujtohet në vitin 2009 ndalimi i agjentëve të BIA-s. Më 2014 kur është bërë ndeshja e parë e Kosovës kemi parandaluar një sulm që ishte nisur nga shërbimi sekret serb ndaj titullarëve tonë që të prishej ajo atmosferë festive”, tha ish-kreu i AKI-së në T7.
Smakaj po ashtu deklaroi se vrasja e Thaçit po planifikohej të bëhej me snajper.
“Me metoda të tilla është synuar vrasja e Thaçit. Metodologji e njëjtë u përdor, që të kryhej atentat ndaj titullarëve tonë në ndeshjen e kombëtares së Kosovës e ishte llogaritur edhe ndaj kryeministrit. Ishte punësuar një snajper nga forcat elitare serbe dhe i cili pastaj, në bashkëpunim me shërbimet partnere. Nuk e kishte mohuar shërbimi serb që ishte planifikuar diçka e tillë. Me partnerët tonë kishim dërguar mesazh në Serbi që të ndalohej kjo dhe të arrestohej personi i dyshuar. Ai ishte arrestuar”, sqaroi Smakaj.
Ai tha gjithashtu tha se i dyshuari ishte snajperist me përvojë në Bosnjë, Kroaci.
