Dinamo me shumë gjasa ka marrë rrugën e kthimit për në Kategorinë e Parë, pasi siç duket eksperienca e tyre në superligë paska qenë më e shkurtër seç drejtuesit mendonin.
Vetëm 23 pikë në 28 ndeshje të zhvilluara kanë bërë që tashmë “makthet” e rënies të jenë reale, por humbja e sotme përballë Kastriotit në “Elbasan Arena” dhemb shumë pasi vjen nga një kundërshtarë direkt për mbijetesën.
Pas “protestimit” që bëri shoferi i autobusit pas kësaj ndeshje, i cili mori autobusin dhe u largua duke lënë stafin e bluve në Elbasan, tashmë është rradha e “Blue Boys” të reagojnë për siguatën në të cilën ndodhet skuadra e tyre.
Ultrasit e Dinamos kanë një mesazh të fortë për presidentin Adrian Bardhi, teksa i kërkojnë këtij të fundit të luajë me ekipin U-21 dhe të largojnë sa më shpejt lojtarët aktualë, pasi ata janë mercenarë që po “zhysin” skuadrën.
“Jeni turpi i Dinamos. Kemi lozur shumë vite në Kategorinë e Parë, por ekip më pa karakter si ky nuk njeh historia e Dinamos. Një tufë me mercenarë dhe hiena po ja pinë gjakun Dinamos dhe po e degdisin përsëri në humnerë.
Këta lojtarë janë turpi i Dinamos, bashkë me ata që i sollën. I themi presidentit se krenaria e Dinamos nuk u vra tani, krenaria e Dinamos u vra kur i ndryshuat logon, krenaria e Dinamos u vra kur ne kërkonim largimin e Shkëmbit dhe askush nuk na dëgjonte.
Krenaria e Dinamos u vra kur ti zgjodhe bashkëpunëtorë bastexhinj dhe mashtrues. Krenaria e Dinamos u vra kur u afruan menaxherë që bënin qoka në kurriz të Dinamos. Krenaria e Dinamos është e vrarë për sa kohë ti do të vazhdosh t’i besosh njerëzve të paaftë dhe të padenjë për të drejtuar Dinamon.
President nëse do të tregosh seriozitet largoji që sot këta lojtarë mercenarë dhe nis punën me ekipin e U 21. Dinamo është aset kombëtar, i cili nuk mund të nëpërkëmbet nga askush”, shkruajnë “Blue Boys”.
https://www.facebook.com/BlueBoysDinamo/posts/5472316046135220
