Kancelari i Gjykatës së Rrethit Gjyqësor të Elbasanit u dhunua mbrëmjen e së dielës, pasi kishte dalë nga një lokal dhe po shkonte në shtëpi.
12 orë nga ngjarja, ende në vendin ku ndodhi sulmi vërehen njolla gjaku. Ndonëse policia e Elbasanit ka dyshime se sulmi ndaj zyrtarit ka ndodhur për shkak të detyrës, ai nuk ka bashkëpunuar me blutë.
Refuzimi për të folur mbi ngjarjen bën që policia e Elbasanit të mendojë se ai ka njohur dy personat që e kanë qëlluar, ose e di mjaft mirë nga i ka ardhur goditja.
Gjithsesi policia e Elbasanit nuk përjashton pistën që kancelari të jetë qëlluar edhe për arsye personale ndaj është duke vijuar hetimet mbi ngjarjen.
Fillimisht, grupi hetimor ka sekuestruar kamerat e sigurisë në zonë, ndonëse ndriçimi me led në lagjen muzeale e bën të vështirë identifikimin e dy agresorëve. Disa persona janë shoqëruar deri tani ku pasi janë pyetur mbi ngjarjen janë lënë të lirë.
Një burim i cili ka parë nga afër ngjarjen mbrëmë sqaron se dy personat kane parkuar mjetin në hyrje të rrugës Egnatia.
Me hap të shpejtë kanë arritur kancelarin dhe kanë nisur ta godasin menjëherë me mjete të rënda në kokë dhe trup duke i lënë plagë të rënda.
Më pas, me shpejtësi i janë drejtuar mjetit duke u larguar menjëherë nga vendi i ngjarjes. Në këto momente Sulkuqi është dëgjuar të rënkojë “Oh moj nëna ime”.
Duke dashur ti shpëtojë kalimtarëve pasi është banues në lagjen “Kala” i gjakosur është ngritur në këmbë dhe është fshehur në rrugicën më të afërt ku duken ende të freskëta njollat e gjakut.
Gjendja e rëndë shëndetësore ka bërë që ai ti drejtohet spitalit të Elbasanit për mjekim, ku raportohet se pas marrjes së ndihmës mjekësore është jashtë rrezikut për jetën. Ka qenë spitali i Elbasanit i cili ka njoftuar policinë.
Sulmi ndaj Sulkuqit ka ndodhur vetëm disa metra larg drejtorisë vendore të policisë Elbasan dhe disa ditë nga zhdukja e sekretares së gjykatës në Lezhë.
/Fax Web/
