Nga Boldnews.al
Me të ndenjurat ulur në stoqe bari të thatë, kongresmenët socialistë flisnin për bujqësinë. Vetëm njërit si zinte b… vend dhe ai ishte Erion Braçe, i cili ndoshta pa dashjen e atij, apo me dashje të plotë të të madhit, u fut në lojën e pushtetit dhe të mbipushteshmit Edi Rama. Foli për vështirësitë në fshat, sesi të ashtëquajturit fermerë me emrin modern vuanin nga shtrenjtimi i farave, plehrave kimikë, pesticideve apo mungësës së subvenscionimit.
Braçe diskutoi sesi oligarkët e bujqësisë po i zënë frymën mijëra fshatarëve dhe teksa ngjirej për të gjetur drejtësi nga kjo padrejtësi, një “Pëllumb partie” u bezdis shumë dhe i thonte që ta përbyllte fjalimin sepse edhe të tjerët do të flisnin. Kjo pjesë ishte sa për dekor, si në thelb nga diskutimet, ashtu edhe në shfaqje vizive.
Edhe ato stoqe bari të thatë ku u ulën “katnarët”, kanë ardhur nga Maqedonia e Veriut, sepse fshatari i sotëm as bar nuk prodhon dot, për ato pak krerë bagëti. Qëllimi i Kongresit të Partisë Socialiste ishte në tjetër vend, po tek bari, nga ai bari çudibërës psikotrop haluçinativ. Kjo i shkon përshtat Rilindjes së kryeministrit Edi Rama i cili vendosi të lejojë kultivimin e kanabisit mjekësor, por ishte i hapur edhe për të menduar nismën për legalizimin e hashashit për përdorim personal. Duatrokitje në sallë dhe shesh, gëzim që nuk gjente dot fund, të qeshura dhe shpresë e madhe se tashmë e tutje ajo që bëhet në “kundërshtim me ligjin” por që mbrohet nga “ligji ekstra i pushtetit”, do të jetë hapur fare.
Mjaft interesante ishte forma e gjetur, ku gjoja ndonjëri që deri dje ishte nënkryeministër bën opozitarin, ndërsa tjetri i Madhi, ai i madhi për fare, bën pushtetarin e të tjerët dëgjojnë nën duhmën e kanabisit, i cili pret të mbijë me aq kujdes në “arat qeverisëse”. Për kanabisin mjekësor Rama e ka ndarë mendjen: do të kultivohet. E thonë edhe gjetjet e Këshillimit Kombëtar, të cilat se kush i plotësoi, si i plotësoi e si i numëroi kjo është një histori e njohur.
Këto i di edhe ish-nënkryeministri Erion Braçe, një zë i “fortë dhe kumbues” në mbrojtje të fermerëve, kryesisht ato të Divjakës ku ai është deputet. Megjithatë nuk i duhet ngrënë haku, mes një stoku me bar të thatë për bagëtitë dhe një stoku me kanabis, qoftë edhe mjekësor apo për përdorim vetjak, Braçe do zgjidhte barin e lopëve, dhive dhe deleve. Por Rama foli gjatë për “barin çudibërës” kanabisin dhe hashashin dhe në këtë pikë me të drejtë ish-nënkryeministri mund të ndihet keq.
Çudi sesi Ministrja e Bujqësisë harroi të përmendte se ishte ngritur “Akademia e Çobenjve”. Barin e kanë, bagetitë virtuale gjithashtu, stallat moderne në konceptin 3D dhe i mungonin vetëm çobenjtë të cilët më parë duhet të kalojnë në “Akademinë e Rilindjes”. Nuk u fol as ajo pjesë se qumështi po vjen nga Serbia dhe mishi nga Brazili dhe Maqedonia e Veriut.
Shqipëria në raportet ndërkombëtare shquhet për dy lloje eksportesh: “eksporton njerëz (emigrantë fatkeqë pa dokumentacion) dhe kanabis me shumicë. Ka nëntë vite që lulëzon hashashi, por disa “qafirë” nga Evropa po dënojnë masivisht trafikantët dhe kjo nuk është një shaka. Rilindjes i duhen këta individë që paranë e drogës dinë ta kthejnë në vlerë që blen votë apo të jep pushtetin e të fortit për të shantazhuar po për votë. Jemi në rrugë të mbarë. Kongresi i Partisë Socialiste pati një efekt të qartë ku kryefjala ishte kanabisi.
