Orges Shehi e ka cilësuar një test të rëndësishëm sfidën e sotme të fituar nga Tirana ndaj Skënderbeut. Trajneri i bardhebluve tha për “SuperSport” se skuadra e tij kishte provuar forcën e saj në një kampionat që si rrallëherë po fitohej me dominim të thellë.
“Gjatë kësaj periudhe ne kemi luftë të madhe me veten, se duhet të jemi profesionistë se me kaq pikë distancë është risi, pra testojmë veten që të jemi gjithmonë profesionistë. Më vjen mirë për mënyrën si u sollën në detyra e impenjim, kur dihet që në këtë distancë mund të bjerë impenjimi, por sot e kishin maksimal.
Të jesh pranë titullit është ndjesi e mirë. Kam drejtuar tre skuadra dhe ishte pikërisht Skënderbeu që mora skuadrën në fillim dhe e nisa me fitoren e Superkupës, te Kukësi dolëm nënkampion në periudhë të shkurtër, tani te Tirana është ndjesia e mirë se e kemi ndërtuar vetë skuadrën dhe kemi pasur ecuri të mirë. Ndjesi e mirë duke u shpallur kampion dhe me dominim.
Është e vërtetë që këtu kam kaluar 9 vite, duke fituar tituj e Kupa e Superkupa. Sigurisht me vjen shumë keq për këtë skuadër, në këtë stadium ku kemi shkruar historinë, është fatkeqësi e madhe që Skënderbeu po i afrohet Kategorisë së Parë. Janë dy vjet në ujëra të turbullta dhe sigurisht keqardhja është shumë e madhe që një skuadër si Skënderbeu është në këto pozita.
Të rinjtë mendoj se janë pjesë e rëndësishme për vazhdimësinë, ata që kemi marrë janë në moshë të re, edhe ata të U19 i kemi futur në lojë gradualisht. Elementi i ri është shumë i domosdoshëm, kur ke një bosht dhe i jep hapësirat e duhura, që të mos dëmtohen, mendoj se rriten dhe personalisht jam partizan i elementit të ri.
Merkato për Europën? Emra nuk jap, kemi nevojë për përmirësime. Por shumicën e skuadrës e kemi, është e rëndësishme kur ke boshtin e ndërhyn te disa elemente. Por po fokusohemi edhe te lojtarët që janë jashtë, vëmendja është që të sjellim lojtarë të jenë të gatshëm të na ndihmojnë që të bëjmë hapin e madh. Sa i përket Europës, është shpejt, sigurisht që punën do ta fillojmë, por do edhe pak fat se varet çfarë të vë shorti përballë. Futbolli është dinamik se edhe lojtarët tanë janë në epiqendër të skuadrave4 të huaja, ndoshta mund të ketë edhe largime, por në kuadrin e futbollit modern që të bëhen largime, por klubi t’i zëvendësojë që të jetë konkurrues edhe në vazhdimësi”, tha Shehi.
