Gramoz Ruçi është pjesë e Kongresit të Partisë Socialiste në krah të kryeministrit Edi Rama.
Ish-kreu i Kuvendit, i cili dha dorëheqjen dhe nga mandati i deputetit pas zgjedhjeve të 25 prillit të vitit të kaluar, duket se nuk e kursen mbështetjen ndaj Ramës, që në këtë Kongres pritet të bëjë disa ndryshime statutore, që përfshijnë shkarkimin e drejtuesve të degëve të PS-së.
Në nisje të pjesës së dytë të Kongresit, i cili tashmë po zhvillohet në Pallatin e Kongreseve, socialistët nderuan himnin e Ukrainës, ndërkohë që kanë nisur fjalët e tyre eksponentë të lartë, duke filluar nga Damian Gjiknuri.
Gjiknuri tha se në PS ka kulturë debati dhe respektim idesh. Pas akuzave se ky është Kongresi i partisë-shtet, Gjiknuri tha se kjo nuk është e vërtetë.
“Kur shikojmë kundërshtarët sesi kacafyten, na pyesin po si ka mundësi që PS, si në opozitë dhe qeverisje, pavarësisht përplasjeve, ka dalë gjithmonë më e fortë. U them është shumë e thjeshtë të nderuar cinikë dhe skeptikë, mjafton të kultivosh kulturën e debatit dhe respektimit të ideve. Kjo është ADN-ja e PS. Këtu gjen përgjigje edhe pyetja se perse kemi qenë më të votuarit. Të shmangim kurthin e partisë-shtet. Ne synojmë ta bëjmë organizatën tonë politike një shtëpi më të hapur. Eksperienca e fituar në këto vite, duke filluar nga zgjedhjet e ardhshme, diktojnë nevojën për adoptimin e rregullave të reja statutore”, tha Gjiknuri.
