Propaganda është mbizotëruese në fjalimet e ministrave dhe deputetëve të PS-së, në punimet që po zhvillon Kongresi i Partisë Socialiste, këtë të Shtunë.
Shokët e shoqet e partisë folën për suksese të mëdha, punë të dobishme për qytetarët, se sa mirë ka qeverisur Edi Rama dhe shpura e tij, që kemi taksa të ulta, ka vende pune pafund, etj, etj, etj…
U fol për zhvillimin e bujqësisë dhe rritjen e importit, gjatë një qeverisje që ka ngritur në protesta të herëpashershme fermerë të cilët kanë dënuar pikërisht politikat e kësaj qeverie dhe janë shprehur se i ka braktisur prej kohësh.
E teksa çmimet janë rritur si asnjëherë më parë në 20 vite, ministrja Ogerta Manastirliu foli për përgjigje të menjëhershme të qeverisë. Fjalën e kishte për paketën e ashtuquajtur “e rezistencës sociale” – që u jep pensionistëve 10 mijë lekë të vjetra në muaj shtesë. “Po tallen me ne, nuk i dua fare”, u shpreh një pensionist kur u pyet për indeksimin e famshëm të kësaj qeverie për pensionet.
Olta Xhaçka, e shfaqur si një stratege në qëndrimet e saj në mbështetje të Ukrainës, foli me pathos për Kosovën.
“…Fokusi kryesor në këto vite ka qenë Kosova. Në çdo konsultë e mbledhje, në çdo përgatitje vizite e qëndrimi, Kosova është gjithmonë aty. Dhe gjithmonë përpara çdo vendimi e çdo qëndrimi shtrohet pyetja si ndikon kjo tek Kosova? Çfarë mund të bëjmë më shumë për Kosovën”, tha Xhaçka, ministre e Mbrojtjes në një qeveri që për herë të parë në më shumë se 30 vite është kritikuar për një qasje kundër interesit të Kosovës. Me shefin e Xhaçkës që është palë te projekti i neojugasllavisë dhe një mik i ngushtë i autokratit serb, ish-zëdhënësit të Milosheviçit, Aleksandër Vuçiç.
Xhaçka u shfaq e qeshur dhe rrezatuese. E duke gjykuar zhvillimet e fundit, s’ka si të mos jetë e lumtur: Këshilli i Ministrave i dha në përdorim për një periudhë 30-vjeçare një plazh në Dhërmi partneres amerikane të vëllait të ministres (duke ngritur shqetësime për nepotizëm dhe konflikt interesi).
Një tjetër kunatë fatlume ishte edhe ajo e Elisa Spiropalit – një tjetër yll i këtij kongresi – e cila nga punonjëse poste u kthye në pronare të një plantacioni ullinjsh, në tokën që ia dha shteti.
Fatin e madh të të shpallurit investitor stregjik e kishte dhe gaztori Gaz Paja, paçka se ashtu si në rastin e ministres u ngritën dyshime për një procedurë korruptive.
Ministrja e Energjisë e Infrastrukturës, Belinda Balluku tha se “në të ardhmen Shqipëria do të bëhet një vend që do të mbulojë të gjitha nevojat e tij për energji dhe madje do të behet edhe eksportues i kësaj energjie”. Në të ardhmen edhe mundet, por aktualisht jemi një batak ku flitet për batërdi të madhe në vjedhjen me energjinë elektrike, me disa që e cilësojnë një aferë famëkeqe si ajo me inceneratorët.
Të tjera thagma u dëgjuan e do dëgjohen në Kongresin e sotëm ku realiteti bëhet llastik dhe ngjyroset siç e do partia. Dhe ashtu siç ka thënë gjatë një takimi elektoral disa vite më parë udhëheqësi Edi Rama: “jemi mirë, por nuk duket”, s’na mbetet tjetër veçse të urojmë: “Gëzime sjelltë Kongresi i nënës Parti për vendin dhe popullin”…
