Kryeministri Edi Rama ka hedhur akuza të forta në drejtim të Bashkimit Europian, duke u shprehur se BE ka një strategji që nuk është strategji.
Në emisionin “Opinion”, Rama tha se procesi i avancimit të negociatave me BE është i tillë që jemi në dorën e tyre, nëse ata duan procesi avancon, nëse jo, mbetet në vend, dhe kjo nuk ka lidhje fare me atë se çfarë bëjmë ne.
“Ne sot kemi bërë aq shumë sa nuk mund të krahasohemi me 8 vite më parë”, tha Rama.
Lidhur me legalizimin e kanabisit për qëllime mjekësore, Rama tha se kjo çështje do të trajtohet në kohën e duhur.
“Ne i hapëm luftë kanabizimit, bëmë atë që askush nuk e mori përsipvr ta bënte. Ne njihemi si arkitektë të kanabizimit për shkak të propagandës që është bërë, por nuk na njohin si të tillë as aleati strategjik, Shtetet e Bashkuara, dhe as Bashkimi Europian”, tha Rama.
Ai tha se nuk ka pasur asnjë fenomen të kanabizimit të vendit, përkundrazi nisëm luftën ndaj një fenomeni që as PD dhe askush tjetër nuk e mori përsipër.
“Ne e fituam luftën me kanabisin, mbaroi ajo histori“, tha Rama.
