Pyetjet e provimit të Vlerësuesve të Arsimit Parauniversitar që zhvillohet sot në Tiranë, bashkë me përgjigjet, u janë dhënë në mënyrë të jashtëligjshme disa personave të caktuar, me porosi të ministres së Arsimit. Denoncimi bëhet nga deputetja demokrate Albana Vokshi, e cila i referohet një mesazhi ardhur në adresë të saj.
“Mirëmëngjesi e nderuar! Jam një mësuese në qarkun Elbasan dhe dua të denoncoj një skandal. Lutem ju jeni e ndjeshme në këto tema ndaj ju lutem mos me nxirrni se me heqin nga puna. Skandali ka të bëjë me provimin që kanë sot Vlerësuesit e Arsimit Parauniversitar ku do të certifikohen si të tillë. Drejtori ynë ka marrë pyetjet që dje ja kanë dërguar vet nga Ministria Drejtoresha e Kabinetit e Ministrisë me urdhër të Ministres për personat e vet. Përsëris pyetje me përgjigje të zgjidhura. Sot pasdite kanë provimin në Tiranë ata kanë pyetje që dje të zgjidhura. Kështu ndodh dhe me maturën dhe gjithçka. Pyetjet dalin para kohe. Po ju dërgoj pyetjet. Lehtësisht të verifikueseshme”, thuhet në mesazhin e publikuar nga Vokshi.
Deputetja e cilëson një skandal.
“Mësuesja në Elbasan denoncon skandalin me provimin e Vlerësuesve të Arsimit Parauniversitar që do të zhvillohet sot në orën 14.00 në Tiranë në shkollën Sabaudin Gabrani. Dalin pyetjet me porosi të Ministres Evis Kushi që të certifikohen të njohurit e Ministres dhe militantet e partisë….. Ky është ‘vetëreformimi’ në arsim për të cilin foli Kryeministri Rama dje në Asamblenë e PS…”, shkruan ajo në një postim në rrjetet sociale.
