Ish-Kryeministri Sali Berisha i cilësoi si personale qëndrimet e Enkelejd Alibeajt, i cili vijon të mos e konsiderojë liderin historik si pjesë e grupit parlamentar të PD.
Berisha u shpreh se Alibeaj ka mendimin e tij, sikundër unë kam timin, por ne nuk përjashtojmë askënd për diversitet mendimesh.
“Unë jam pjesë e Grupit Parlamentar të PD dhe do të marr pjesë në çdo mbledhje. Alibeaj vijon të jetë Kryetar i Grupit Parlamentar deri në zgjedhjen e strukturave drejtuese, pasi sipas statutit një prej nënkryetarëve të PD automatikisht është edhe kryetar grupi. Kuvendi i 11 dhjetorit shkarkoi Kryetarin, Nënkryetarët, Sekretarin e Përgjithshëm, Kryesinë dhe pezulloi Këshillin Kombëtar, por nuk kemi pse shkojmë në vendime ekstreme për të mos e njohur Alibeajn si kryetarin e grupit”, tha Berisha.
Ai gjithashtu u pyet se çfarë mendonte nëse Lulzim Basha dhe mbështetës të tij do të krijonin një parti të re, ndërsa u shpreh se kjo është çështje e tyre, por ne nuk përjashtojmë askënd.
