Deputeti i PD-së Edi Paloka ka reaguar, pasi Yuri Kim ka takuar sot Enkelejd Alibeajn, duke e njohur këtë të fundit si drejtues të komanduar të Partisë Demokratike.
Paloka shprehet se ky takim është turp dhe se Kim shkel ligjet e Shqipërisë, duke mos njohur vendimet e gjykatave të vendit e duke pasur synim ta përçajë opozitën.
Postimi i Edi Palokës:
Ky është më tepër se turp, është shkelje e jo vetëm çdo etikë, por dhe ligjeve te Republikës së Shqipërisë!
Kjo zonja që uroi Ramën për “fitoren historike” pa mbaruar akoma procesi zgjedhor më 25 prill ; që ka dalë hapur në mbështetje të qeverisë më të korruptuar në rajon (siç e cilëson vetë Departamenti Amerikan i Shtetit) dhe që prej kohësh është angazhuar në vetë të parë në përçarjen e opozitës shqiptare, sot ka ndërmarrë një akt të fundit, gjithnjë në shërbim të të njëjtit qëllim.
Zonja ambasadore me arrogancë tregon se jo vetëm nuk respekton Konventën e Vjenës po nuk njeh as vendimet e gjykatave shqiptare, megjithëse flet gjithë kohën për drejtësinë.
Ti zonjë mund të takosh kë të duash dhe si të duash, po nuk mund të vendosesh mbi gjykatat shqiptare e sidomos mbi vullnetin e lirë të demokratëve shqiptare!
