“Vari more teneqen” (Yuri Kim-it). Kështu shprehet ish-ministri i Drejtësisë Ylli Manjani pasi ambasadorja amerikane në vendin tonë e quajti Enkelejd Alibeajn kryetar të PD-së, duke injoruar vendimin e gjykatës së Tiranës që njohu Kuvendin e 11 Dhjetorit.
Në një postim në FB, Manjani shkruan:
A mund të mos i japim asnjë sekond kohë selfieve të Yuri Kim?! Akoma nuk u bindët se zonja gjendet gjithmonë në krah të dështakëve?! Duhen ende prova?! Po të dalë ore me kë të dojë në resme. Kujt i plasi!? A mos na ulen çmimet po të merremi me të?! Apo na përmirësohet cilësia e demokracisë!? Apo do afrohemi me BE me të cilën Amerika e nuk ka lidhje!! Vari more teneqen!
Postimi i Kim
Më herët gjatë ditës, ambasadorja amerikane zhvilloi një takim në ambientet e Kuvendit me Enkeljed Alibeajn. Ajo postoi dhe një foto të të dyve në Twitter, ndërsa Alibeajn e cilëson “kryetar të PD-së”.
“Diskutim shumë i mirë sot me ushtruesin e detyrës së kryetarit të Partisë Demokratike dhe kreut të grupit parlamentar Enkelejd Alibeaj për një gamë të gjerë çështjesh. SHBA ka pasur një marrëdhënie të fortë e të veçantë me PD që në lindjen e saj. Ne e vlerësuam këtë marrëdhënie dhe rolin e domosdoshëm të PD. SHBA dhe Shqipëria kanë shumë punë përpara për ta mbajtur Shqipërinë në rrugën e anëtarësimit në BE, demokracinë, ndërtimin e bashkëpunimit në mbrojtje dhe zgjerimin e mundësive të biznesit dhe ekonomik për të gjithë. Le të vazhdojmë së bashku përpara, jo mbrapa”, shkruan në rrjetin social ambasadorja.
2/2 🇺🇸 & 🇦🇱 have much work ahead to keep Albania on the path to EU membership, democracy, build defense cooperation, and expand business & economic opportunities for all. Let’s keep moving together forward, not backwards!
— Ambassador Yuri Kim (@USAmbAlbania) April 5, 2022
Reagimet
E teksa Kim e quan Alibeajn kryetar të komanduar të PD-së, ka një vendim të gjykatës së Tiranës që ka njohur Kuvendin e 11 Dhjetorit 2021 të PD-së, zhvilluar në “Air Albania” dhe vendimet e marra aty. Kuvendi vendosi mes të tjerash shkarkimin e Lulzim Bashës si kryetar dhe që PD drejtohet përkohësisht nga “Komisioni i Përkohshëm i Rithemelimit” deri në zgjedhjen e kryetarit të ri. Ish-kryeministri Sali Berisha – me të cilin Kim ka pasur përplasje dhe 28 të tjerë, janë anëtarë të Komisionit të Rithemelimit.
Një prej tyre, deputeti demokrat Edi Paloka u shpreh në një postim në FB se reagimi i ambasadores ishte i turpshëm.
Deputeti tjetër Tritan Shehu e quajti “lajm sekondar”.
