Partia Socialiste duket se ka përjashtuar nga negociatat për zgjedhjen e Presidentit të ri të vendit, Partinë Demokratike, e cila drejtohet zyrtarisht nga Grupi i Rithemelimit.
Sot mediat raportuan lidhur me një takim të të mandatuarve të PS-së, Damian Gjiknuri, Taulant Balla dhe Elisa Spiropali, me kreun e Grupit të PD, Enkelejd Alibeaj, por asgjë nuk konfirmohet zyrtarisht nëse ka pasur ose jo një takim të tillë.
Prej disa ditësh në qarqe të ndryshme politike por edhe mediatike ka qarkulluar emri i Lulzim Bashës si kandidat, ndërsa ky i fundit nuk ka dhënë një përgjigje të prerë, por ka bërë një lojë fjalësh.
Ndërkohë sot, Ministrja e Shtetit për Marrëdhëniet me Parlamentin, Elisa Spiropali me një status në Twitter ka konfirmuar nisjen e negociatave, por ka përjashtuar se do të ketë negociata me Komisionin e Rithemelimit, si strukturë drejtuese e Partisë Demokratike.
Ajo shprehet se Berisha është i përjashtuar nga ky proces.
“Sali Berisha është vetpërjashtuar nga një proces ku nuk e ka ftuar askush dhe ku askush nuk ka pasur asnjë plan për ta ftuar! Procesi i zgjedhjes së Presidentit të Republikës nuk parashikon pjesëmarrjen e të vdekurve që nuk vdesin”, shkruan Spiropali.
Në anën tjetër, Berisha ka akuzuar Kryeministrin se po tenton të ofrojë deputetë, por do të dështojë në tentativën e tij. Gjithashtu Berisha ka deklaruar se opozita nuk do të pranojë asnjë emër të propozuar nga Edi Rama për postin e Presidentit.
