Dy afrikanë që tentuan të kalonin kufirin me dokumente të dyshuara të falsifikuara janë arrestuar në Kapshticë, bëri me dije policia këtë të Hënë.
Sipas të njëjtave burime, në pranga është vënë dhe një francez, i cili i kishte pajisur këta dy shtetas, me dokumente false, kundrejt shpërblimit.
“Shërbimet e Policisë Kufitare, në bashkëpunim me specialistët e Seksionit për Hetimin e Krimit Ekonomik dhe Financiar në DVP Korçë, bënë arrestimin në flagrancë të shtetasve M.M., 41 vjeç, K.P., 32 vjeç, të dy banues në Comoros, Afrikë dhe T.M., 59 vjeç, banues në Paris, Francë. Në hyrje të Republikës së Shqipërisë, dy shtetasit afrikanë kanë paraqitur pasaporta franceze në emër të dy shtetasve të tjerë. Nga kontrolli i mëtejshëm që shërbimet e Policisë Kufitare kryen në sistem, këto dokumente rezultuan të dyshuara të falsifikuara. Në bazë të hetimeve të mëtejshme hetimore dyshohet se shtetasi francez T.M. ka ndihmuar dy shtetasit afrikanë, kundrejt shpërblimit, duke iu siguruar atyre dokumentet e identifikimit, me premtimin për t’i kaluar në drejtim të vendeve të BE-së, nëpërmjet vendit tonë”, thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Korçë, për veprat penale “Falsifikimi i letërnjoftimeve, i pasaportave ose i vizave”, “Kalimi i paligjshëm i kufirit shtetëror” dhe “Ndihma për kalim të paligjshëm të kufijve”, shtuan të njëjtat burime.
