Një atentat me armë zjarri ka tronditur mbrëmjen e së dielës Tiranën, por jo vetëm.
Një person është ekzekutuar me armë zjarri në autostradën Tiranë – Durrës.
Persona akoma të paidentifikuar kanë qëlluar në drejtim të mjetit “Land Rover”, brenda së cilës ishte një i ri rreth 35 vjeç.
Makina ndaj së cilës është qëlluar me armë ishte marrë me qira pranë Rinasit.
Shtetasi Hekuran Xhixha e ka dhënë automjetin me qira, pikërisht në qendrën ku jepen makina me qira.
Viktimë e atentatit ka mbetur shtetasi Iljaz Çali. Ky i fundit dyshohet se është qëlluar nga një automjet tjetër, që ishte në lëvizje.
Policia ka shkuar menjëherë në vendin e ngjarjes, duke bllokuar edhe qarkullimin në autostradë.
Uniformat blu të Tiranës lajmëruan se janë ngritur pika të kontrollit në rrugët interurbane, duke bashkëpunuar ngushtë me Policinë e Durrësit, Elbasanit dhe të Lezhës, me qëllim zbardhjen e ngjarjes së rëndë.
Njoftimi i policisë:
Më datë 03.04.2022, në autostradën Tiranë-Durrës, përballë DHL-së, në rrethana ende të paqarta, është qëlluar me armë zjarri drejt një automjeti tip “Land Rover” dhe si pasojë ka ndërruar jetë drejtuesi i mjetit, ende i paidentifikuar.
Shërbimet e Policisë kanë shkuar menjëherë në vendngjarje dhe po vijojnë krehjen e zonës me qëllim kapjen e autorit/ëve.
Në bashkëpunim me DVP Durrës, Elbasan e Lezhë janë ngritur menjëherë pika kontrolli në rrugët interurbane.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
