Partia Demokratike tashmë është futur në një spirale juridike, e cila pritet të zgjasë.
Në emisionin “Të Paekspozuarit” në MCN TV, është diskutuar ankimimi që ka dorëzuar Enkelejd Alibeaj, pasi Gjykata njohu Kuvendin e Sali Berishës.
Në emision kanë debatuar, Ivi Kaso, përfaqësues ligjor i Komisionit të Rithemelimit dhe avokati Dorian Matlija, që kanë mendime të ndryshme për çështjen.
Pjesë nga biseda:
Ivi Kaso:Për efekt të ligjit, nëse i referohemi dispozitës përkatëse, ligji parashikon që ankimi bëhet nga palët ose pjesëmarrësit në proces. Ligji thotë që për të bërë ankim, duhet të jesh ose palë në proces ose pjesëmarrës. Nuk ka gjyqtar të papërgjegjshëm, të bëjë një gjyq pa fakte, pa dosje. Ne si PD nuk do të lejonim të zhvillohej një seancë dhe ne të mos ndërhynim me kërkesë me cilësinë e palës tjetër.
Dorian Matlija: E gjithë ideja është që gjykatat shqiptare nuk kanë zhvilluar praktikë me partitë, por me subjekte të ngjashme si shoqatat dhe fondacionet. Subjektet e interesuara, nuk bëhet detyrimisht gjyq me palë. Një palë e interesuar mundet të bëjë dy veprime. Ose të ankohet, ose të kundërshtojë ç’regjistrimin në një vendim të dytë. Nuk besoj se do të kufizohet thjesht me të qenurit palë. Praktika gjyqësore në rastin e organizatave, parashikon që palët e interesuara të ankohen.
Ivi Kaso: Neni 442/a, ankimi është akti që palët ose pjesëmarrësit në proces, kundërshtojnë… Ose palë ose pjesëmarrëse. Nuk ka palë të interesuara që lindin pas procesit. Nuk mund të jesh palë pas pilafit. Mjeti që thatë ju, është gjë tjetër dhe nuk është ky rasti. Ky është rast ankimi ndaj një vendimi. Është njësoj sikur ta bëjë zoti Rakipi apo Vangjeli ankimin. Këtë nuk e ndan Gjykata e Apelit. Këtë çështje, e verifikon Gjykata që ka dhënë vendimin, Gjykata e Tiranës.
Dorian Matlija: A quhet disponim ankimi ky që thatë? Atëherë ky disponim ankimi do të verifikohet nga dikush. Derisa të bëhet disponimi i ankimit, sërish vendimi në fjalë, i regjistrimit të veprimeve të bëra në 11 dhjetor nuk ka marrë formë të prerë.
Ivi Kaso: Për hir të praktikës së parregullt të Gjykatës së Tiranës. Kanë praktikë që e kanë për të mbrojtur veten. Kur të kalojë afati ligjor, vendimi merr formë të prerë. Aspekti ligjor është i mbyllur.
Dorian Matlija: Për interest ë publikut duhet kuptuar, se cili është momenti që bën të mundur që partia bien në dorë të njërit apo tjetrit. Një vendim gjykata nuk është pjesa e mjaftueshme. Duhet të marrë formën e prerë, të pasqyrohet në regjistër, të dalë edhe një ekstrakt.
Ivi Kaso: Kjo për sa i përket efekteve ndaj të tretëve. Por brenda Partisë ka filluar që në 11 dhjetor.
Dorian Matlija: Kush janë personat e tretë? Pra pa dalë një ekstrakt nga regjistrimi i partive politike, vetëm atëherë mund të themi se ka marrë fund çështja juridike.
