Alibeaj apeloi vendimin e Zhukrit për Kuvendin e 11 dhjetorit, PD: S´ka asnjë tagër, e kemi shkarkuar

Partia Demokratike, e cila prej 25 marsit, bazuar në vendimin e Gjykatës së Tiranës, drejtohet nga Komisioni i Rithemelimit, ka reaguar lidhur me një padi që është depozituar në Kuvend nga Enkelejd Alibejaj, kundër vendimit të dhënë nga gjyqtari Agron Zhukri, i cili njohu Kuvendin e 11 dhjetorit dhe vendimet që rrjedhin prej tij, përfshi edhe ndryshimet statutore.

Përmes një deklarate, PD thekson se Alibeaj është shkarkuar si Nënkryetar i PD dhe në kushte të tilla nuk plotëson asnjë kriter legjitim për tu ankuar.

“Nga mediat jemi vënë në dijeni që nën emrin e Partisë Demokratike është paraqitur një kërkesë ankimore kundër vendimit nr.1346/222 dt.25.03.2022 të Gjykatës së Rrethit Gjyqësor Tiranë nënshkruar nga Enkeled Alibeaj.

Së pari, sqarojmë se askush nuk mund të ndërmarrë veprime në emër të Partisë Demokratike. Kuvendi Kombëtar i PD dt.11 dhjetor 2021, ka mandatuar si të vetmin organ drejtues të Partisë Demokratike Komisionin e Rithemelimit të Partisë. Gjithashtu, Kuvendi ka shkarkuar Z. Alibeaj si nënkryetar i Partisë Demokratike. Pra, nuk përfaqëson PD në asnjë marrëdhënie me të tretët.

Së dyti, përsa i takon kërkesës ankimore, ajo është paraqitur nga persona të palegjitimuar të bëjnë ankim kundër vendimit të mësipërm të gjykatës”, thuhet në reagimin zyrtar.

Sipas deklaratës, ky gjykim është zhvilluar komform proçedures pa të paditur, pa persona të tretë dhe pa asnjë pjesmarrës tjetër, vetëm me “kërkues” Komisionin e Rithemelimit të PD.

“Në këto kushte, Sekretaria e Gjykatës ku është paraqitur kërkesa ka detyrimin tua kthejë mbrapsht atë komform kritereve të Kodit të Proçedurës Civile.

PD denoncon aktin Basha – Alibeaj si përpjekje e dëshpëruar e Edi Ramës për të mbajtur peng vulën e PD kundër vullnetit të shumicës së demokratëve të shprehur qartë në kuvendin e tyre më 11 Dhjetor 2021 dhe të çertifikuar në kutitë e votimit më dt. 6 mars 2022”, thuhet në deklaratë.

Çfarë parashikon Kodi i Procedurës Civile

Neni 442/a
Ankimi

“Ankimi është akti me të cilin palët ose pjesëmarrësit e tjerë në proces parashtrojnë kundërshtimet e tyre ndaj vendimit të gjykatës dhe veprimeve të përmbaruesit gjyqësor, për të mbrojtur të drejtat dhe interesat e tyre”