Ish-ministri i Drejtësisë, Ylli Manjani ka reaguar së fundmi pas skandalit të anëtares së KPK, Genta Bungo, e cila ka kërkuar shkarkimin e drejtueses së Prokurorisë së Tiranës, Elisabeta Imeraj, sepse ajo është ‘maloke’.
Termi diskriminues i përdorur nga anëtarja e Vettingut është dënuar nga mbarë opinioni publik, si fyerje dhe diskriminim mbi baza krahinore.
Manjani shkruan në rrjetet sociale se nuk është thjesht Genta por moda politike që karikon shqiptarin kundër shqiptarit me mllef.
Postimi:
Nuk është thjesht Genta, por moda politike që sundon prej vitesh.
Është moda politike që të bën “modern” ti thuash shqiptarit të veriut malok. Kjo modë e konsideron të folurën e malësorit dragobisht.
Është moda politike që shqiptarin e veriut e quan jo vetëm malok, por edhe zabtues, shpellar e madje edhe Çeçen.
Sipas modës ka një ndarje krahinore, madje deri edhe rracore në shoqëri. Kjo është psikoza që kanë ngulur modernët e politikës, që lakuriqsinë, narkomaninë dhe orgjitë e veta i quan moderne.
Është kjo moda politike që u shëmb shtëpitë dhe rrëmben pronat disa shqiptarëve vetëm për shkak se janë malokë.
Është po e njëjta modë që i pret fjalën Nënës Lizë në protestë. Se Liza është Malokë. Nuk i pret e as i lyen flokët me modë në parukeri.
E kuptoni apo jo?
Moda politike të heq shtëpinë, pronën e fjalën, jo më vendin e punës!!!
Jo vetëm veriori, por edhe i varfri është Malok, sipas modës politike. Veriu është përkufizim i varfërisë. Veriori duhet të mbetet i varfër.
Edhe opozitari është malok. Haraç përshkak të tropojanit Berishë ky, që duhet tja paguajë “sulltanit” të modës çdo opozitar.
Çdokush që modernët e fusin në fokus për ta dënuar e shpallin fillimisht Malok.
Hitlerianë!
Prokurorja Elisabeta Imeraj nuk është e para e as e vetmja viktimë e modës antimalokë. Ajo është prova e fundit e sekzistencës së modës politike të dasisë sociale për arsye politike.
Genta nuk është as e para e as e vetmja që e përdor atë fjalë mllefi. Ajo thjesht e ka dëgjuar aty vërdallë dhe e përdor për modë. Vettingu ndaj malokëve ka qenë më i ashpër se ndaj jomalokëve. Mund t’u përmend plot emra “malokësh” që i ka këputur vettingu pa asnjë shkak, provë apo llogjikë ligjore.
Ndaj këtë “nder” duhet tja dimë atij modernit politik me çitjane, si autor ekskluziv i rilindjes së kësaj mode.
Nuk është thjesht Genta por moda politike që karikon shqiptarin kundër shqiptarit me mllef.
Kështu sundon e qetë politika..
