Më shumë se 30 qendra banimi rreth kryeqytetit të Ukrainës janë sërish në kontrollin e forcave ukrainase, sipas një deklaratë të këshilltarit të presidentit.
Autoritetet ukrainase njoftuan mëngjesin e sotëm se kanë marrë në kontroll gjithashtu Bucha dhe Brovary. Forcat ruse janë tërhequr gjithashtu nga aeroporti Hostomel pranë Kievit, sipas një deklaratë të ministrisë së mbrojtjes së Mbretërisë së Bashkuar.
Rusia tha në fillim të kësaj jave se do të zvogëlonte në mënyrë drastike operacionet e saj ushtarake rreth Kievit dhe Chernihiv ndërsa analistët thanë se presin që forcat ruse të pozicionohen në Ukrainën lindore.
Rusia akuzoi Ukrainën për kryerjen e një sulmi ajror kundër një depoje karburanti në qytetin rus të Belgorodit, një incident që Kremlini tha se mund të ndikojë në bisedimet e paqes, por Kievi mohon përgjegjësinë.
Ministria ruse e mbrojtjes pretendon se dy helikopterë ukrainas goditën objektin në Belgorod, rreth 35 km nga kufiri me Ukrainën, pasi hynë në Rusi në një lartësi jashtëzakonisht të ulët rreth orës 5 të mëngjesit me orën e Moskës.
Zjarri që shpërtheu aty detyroi evakuimin e disa njerëzve, por vonë gjatë ditës kryebashkiaku i Belgorodit, Anton Ivanov tha se shërbimet zjarrfikëse arritën t`i vinin flakët nën kontroll. “Nuk ka asnjë kërcënim për jetën dhe shëndetin e njerëzve. Të gjithë banorët mund të kthehen në shtëpitë e tyre”, tha ai në një postim në internet.
