Ish-deputeti socialist Alqi Bllako do të mbetet në qeli. Ndaj tij, GJKKO konfirmoi sot masën e “arrestit me burg”, dhënë më herët në mungesë.
E njëjta masë u kërkua nga SPAK, ndërsa mbrojtja kërkoi lirimin e Bllakos nga qelia, duke pretenduar në seancë se nuk ka shkelje penale nga ana e ish-deputetit.
Bllako akuzohet për “Shpërdorim detyre” në bashkëpunim dhe “korrupsioni pasiv i funksionarëve të lartë shtetëror” në hetimin për inceneratorin e Fierit.
Prokuroria Posaçme e akuzon ish-deputetin se në bashkëpunim me ish-ministrin e Mjedisit, Lefter Koka dhe vartësin e tij Pëllumb Abeshi, kanë paraqitur dokumente false para Këshillit të Ministrave për shpronësimin e tokës ku u ndërtua inceneratori. Sipas akuzës, ata kanë paraqitur dhe propozuar pranë Këshillit të Ministrave projektvendimin dhe relacionin për shpronësim për kategorinë e pronës “tokë truall”, ndërkohë që rezulton se prona është “tokë arë”.
Bllako akuzohet se ka përfituar rreth 150 mln lekë (të vjetra) ryshfet për të favorizuar kompaninë që fitoi koncesionin për ndërtimin e inceneratorit në Fier – “Integrated Technology Waste Treatment Fier”. Sipas akuzës, shuma e parave është përfituar nga paga si “Drejtor Kantieri” që babai i Alqi Bllakos ka marrë pranë shoqërisë “Integrated Energy BV SPV” me aksioner Klodian Zototn – në kërkim për dosjet hetimore të inceratorëve të Elbasanit dhe Fierit.
Po ashtu, sipas prokurorisë, Bllako dhe Klodian Zoto (në kërkim për hetimet e inceneratorëve të Elbasanit dhe Fierit) kanë udhëtuar së bashku jashtë vendit.
Gjykata e Posaçme, me kërkesë të prokurorisë, vendosi të Hënën caktimin e masës së sigurimit pasuror “sekuestro preventive” për një apartament në Tiranë, në zotërim të të atit të Alqi Bllakos – Edmond Bllako. Apartamenti është me sipërfaqe 99.48 m2, me vlerë sipas kontratës shitblerjes në shumën 144,246 Euro. Sipas SPAK, prona përmbush vlerën ekuivalente të përfituar në mënyrë të paligjshme nga Alqi Bllako në shumën 14,964,900 (katërmbëdhjetë milion e nëntëqind e gjashtëdhjetë e katër mijë e nëntëqind) lekë.
Lexo edhe:
Udhëtimet jashtë vendit të Bllakos dhe Zotos, avokati i ish-deputetit: Nuk janë prova bindëse
