Nga Boldnews.al
Artan Lame, kreu i Agjencisë Shtetërore të Kadastrës, ka kthyer sytë edhe nga tenderat. Në kulmin e akuzave për agjencinë që drejton, ku perceptimi i njerëzve flet për korrupsion deri në palcë apo në çdo qelizë, Lame ka finalizuar bërjen e një tenderi me vlerë 1 milionë USD.
Sipas dokumenteve që disponon Boldnews.al, Agjencia Shtetërore ka shpallur fituesin, disa muaj pasi ishte hapur.
Vonesa në shpalljen e fituesit ka ardhur si pasojë e ankesave të operatorëve të tjerë, të cilët kanë kundërshtuar vendimmarrjen e Lames. Por, në dokumente rezultoi se fituesi, është kompania që ka ofruar më shumë!
Një paradoks i madh, në krizën aktuale të çmimeve apo edhe të akuzave në bërjen e tenderave. Por, deri më sot Lame apo Agjencia e tij ishte atakuar për probleme madhore me pronar, tashmë po bën “pis” edhe procedurat tenderuese. Në mandatin e tretë të qeverisë, dhe në ditët më të errëta të opozitës, Lame ka preferuar që të ketë dorë të lirë. Madje, edhe nga “gërricjet” e vogla të ministrit Ulsi Manja. Fakti se Agjencia Shtetërore e Kadastrës varet direkt nga Këshilli i Ministrave, e ka bërë Lamen që t’u bëjë karshillik edhe ministrave.
Agjencia Rajonale e Kadastrës së Vlorës ka qenë më e akuzuara dhe e kritikuara, për shkak të problemeve madhore me pronat. Duke filluar nga Zvërneci, për të shkuar në Lungomare, Karaburun apo edhe brenda qytetit. Disa drejtorë janë në burg, të tjerë nën hetim. Madje, ka pasur ndryshime të shpeshta edhe në rangun e drejtorit.
Por, në këto radhë, Boldnews.al do të ndalet te tenderi për ndërtimin e godinës së re të Agjencisë Rajonale të Kadastrës në Vlorë. Objekti i tenderit ishte “rikonstruksion i Godinës së ASHK-së Vlorë”, me fond limit 105.351.850 lekë pa TVSH.
Kanë marrë pjesë disa kompani, ku oferta më e ulët ka qenë 91 milionë lekë. Por, fitues është shpallur bashkimi i operatorëve ekonomikë “Eurondërtimi 2000” dhe “AD-STAR”, me ofertë 98.256.649 lekë pa TVSH. Ose, rreth 1 milionë USD!
Sipas dokumenteve, ndërtesa ku do zhvillohet projekti, është një objekt 3 katësh në formë lineare, i ndodhur në rrugën “7 Nëntori”.
“Funksioni i mëparshëm ka qenë Shtëpia e Oficerëve pra, hoteleri. Me vendim të Këshillit të Ministrave ka kaluar nga Ministria e Mbrojtjes në administrim të Agjencisë Shtetërore të Kadastrës” thuhet në dokumente.
Sipas saj, objekti ekzistues është komplet i pajetueshëm, ku mungojnë dritaret dyert. Ka dëmtime të rënda strukturore dhe ndërtimore. Suvatë janë të degraduara në masën 80%. Pllakat dhe shtresat po ashtu janë të dëmtuara në pjesën dërrmuese të ndërtesës.
“Shtresat e tarracës janë të degraduara dhe nuk e kryejnë më izolimin e tarracës. Muret për shkak të ujërave që vijnë nga tarraca, janë shumë të dëmtuara” shkruhet në dokumente.
