Zëvendëskryeministri, njëherësh ministër i Shtetit për Rindërtimin dhe Programin e Reformave, Arben Ahmetaj deklaroi sot se Shqipëria kishte rritjen ekonomike më të lartën në Ballkanin Perëndimor në 2021.
Ahmetaj, duke folur në Kuvend, deklaroi se kjo ka ardhur nga menaxhimi i mirë që iu është bërë financave publike.
“Shqipëria kishte rritjen ekonomike më të lartën në Ballkanin Perëndimor në 2021, dhe kishte rënien më të ulët në 2020-ën. Nga se ka ardhur, nga keqmenaxhimi?”, tha ai.
Duke folur mbi ndryshimet e propozuara në buxhetin e vitit 2022 si përgjigje ndaj krizës së çmimeve për shkak të evazionit rus në Ukrainë, Ahmetaj u ndal në debatin që po zhvillohet nëse duhet të hiqen taksat apo duhet të shërbehet me mbështetje direkte.
“Debati është shtruar nëse duhet të hiqen taksat, apo të shërbehen me mbështetje direkte. Studimet më të fundit nga “The Economist” thonë se për çdo 1 njësi taksë të hequr qytetari, në rastin më të mirë, në tregje të kontrolluara, përfiton vetëm 70% të saj, 30% shkon për ata që opozita ju thotë oligark. Në një normalitet, konsumatori përfiton vetëm 30% dhe 70 % shkon për atë që ju thoni oligark”, tha Ahmetaj.
Sipas Ahmetaj, me ndryshimin e bërë në tatimin mbi të ardhurat, janë 425 mijë të punësuar ose 60.7% që paguajnë zero taksë, 58 mijë ose 8.3% me pagë 40-40 mijë lekë që paguajnë vetëm 0.7 % të pagës bruto dhe 166 mijë ose 23.7 % që paguajnë nga 1.5 deri në 9% të pagës bruto.
“Nëse do të ishte taksa famëkeqe prej 10 %, do të paguheshin 36 miliardë lekë sot nga qytetarët në buxhet, për shkak të progresivitet që ne e thellojmë në favor të atyre që kanë nevojë, paguajnë 24 miliard lekë. 12 miliardë lekë sot mbeten në xhepat e qytetarëve”, deklaroi ai.
Ahmetaj iu përgjigj edhe debatit për ngarkesën fiskale mbi pagat, krahasuar kjo me vendet e rajonit.
“Një qytetar në Maqedoninë e Veriut në 40 000 lekë pas taksimit i mbeten 25 400 lekë, një serbi 30 000 lekë dhe një shqiptari 35 000 lekë“, tha ministri.
Ahmetaj tha se, qeveria ka dhënë për subvencionimin e çmimit të energjisë elektrike 28 miliardë lekë, ndërsa Banka Evropiane ka dhënë 8 miliardë lekë, duke e çuar në total shumën në 360 miliardë lekë.
“Çmimi i energjisë elektrike është 5-6 fish më i lartë, nuk zbret nën 250 euro në tregun ndërkombëtar. Qeveria shqiptare ka vendosur 28 miliardë lekë që të mos rritet çmimi i energjisë për qytetarët. Banka Evropiane 8 miliardë lekë. Në total janë 360 milionë dollarë në dispozicion të furnizimit me energji elektrike”, tha ai.
Një tjetër mbështetje që vjen përmes Paketës së Rezistencës Sociale, sipas Ahmetaj, është edhe subvencioni me 100 lekë për litër naftë për kompanitë e transportit publik për të bërë që të mbahet e pandryshuar bileta për qytetarin.
“Të dhënat tregojnë se po shkohet drejt përgjysmimit të konsumit të naftës në muajin mars”, tha ai.
Po ashtu, Ahmetaj bëri të ditur se mbështetja për naftën pa taksa për fermerët ka shkuar në 14.5 miliardë lekë.
