Trajneri i Teutës, Renato Arapi, beson se skuadra e tij ka ende shanse të kualifikohet në finalen e Kupës e Shqipërisë. Pas sfidës së parë të humbur 2-1 përballë Laçit, tekniku i durrsakëve u shpreh i pakënaqur në “SuperSport” për gabimet që kishin sjellë këtë rezultat dhe shprehu dyshime për momentin e penalltisë së anuluar.
“Do të tentojmë gjithçka, e kishim përgatitur të ishim të kujdesshëm, por goli i shpejtë ndryshoi mënyrën e interpretimit. Ajo që më vjen keq është goli i dytë se është pjesa që kemi punuar më shumë këtë përiudhë dhe më vjen keq kur e pëson në mënyrë naive. Futbolli është i tillë. Me ndërrimet jam i kënaqur se ekipi reagoi, me atë gol të shënuar jemi në lojë akoma për ndeshjen e kthimit.
Nga jashtë mund të flasim shumë lehtë, por duke qenë se i dimë problematikat që ka ekipi ne që jemi brenda. e nisëm si të kujdesshëm se është me dy takime. Nëse sulmojmë mund të kemi më shumë probleme mbrapa dhe ndaj kemi zgjedhur këtë mënyrë.
Sulmuesit duhet të jenë më të qetë, të marrin më shumë përsipër. Me futjen e Hykës dhe Sebinos, i dhanë një impuls tjetër lojës dhe jam i kënaqur.
Kur kërkon të fitosh është akoma e vështirë se do të lesh hapësira mbrapa. Por kemi kohë të përgatitim ndeshjen dy javë, nuk duhet humbur besimi dhe durimi e duhet të vazhdojmë të punojmë se për këtë punë jemi këtu.
Penalltia e anuluar? Mund të ketë kontakt, ka pasur kontakt te këmbët. Rubini ka qenë i fokusuar te topi dhe ka qenë mbrojtësi i Laçit i cili ka qenë më shumë i fokusuar te Rubini se sa te topi”, tha Arapi.
