Një tjetër protestë është njoftuar se do të mbahet nesër rreth mesditës para godinës së SPAK. Sërisht kjo protestë qytetare është organizuar përmes rrjeteve sociale, ndërsa synon që të “zgjojë nga gjumi” Prokurorinë Speciale për hetimin e dosjeve të korrupsionit.
“Të arrestohen peshqit e mëdhenj, janë dosje që prej vitesh ndodhen në Prokurorinë Speciale dhe askush nuk vepron. Prokurorët e SPAK paguhen me miliona në muaj nga taksat e shqiptarëve dhe duhet të bëjnë detyrën, të luftojnë korrupsionin qeveritar”, tha njëri prej protestuesve të sotëm, në protestën që po zhvillohet para godinës së Kryeministrisë kundër rritjes së çmimeve.
Në SPAK ndodhen disa nga dosjet “e nxehta” që lidhen me koncensionet në fushën e shëndetësisë, por jo vetëm, tenderat sekretë si dhe afera e inceneratorëve.
“SPAK është bërë KAPS duhet të veprojë. Sot pati një lëvizje të institucionit, por nuk mjafton. Në aferën e 430 mln eurove nuk mund të mos jenë përfshirë peshqit e mëdhenj”, tha protestuesi.
