Kuvendi rrëzoi seancën e të enjtes projekt-rezolutën e PD për rritjen e çmimeve që në thelb të saj kishte heqjen e taksës së qarkullimit dhe uljen në 6% të TVSH për produktet e shportës. Kreu i grupit parlamentar të PS, Taulant Balla, duke komentuar votën kundër të mazhoirancës tha se paketa e opozitës ishte më e vogël se ajo që ka vënë në dispozicion qeveria.
“Në kohë lufte ca duhet të fitojnë më pak ose aspak ndërsa ata që e kanë të vështirë të përballen me këtë situatë duhen ndihmuar. Merrni kë të doni dhe Maqedonnë e Veriut, Kosovën dhe Malin e Zi, krahasojini paketat. E patë paketën që solli PD në seancën e fundit në Kuvend, ja bëtë llogarinë? Opozita erdhi me një paketë rezistencë më të vogël se ajo që ka vendosur në dispozicion qeveria, rasti unik në botë që opozita vjen me një paketë më të vogël sesa qeveria. Kemi fatin që kemi një qeveri të përgjegjshme. 576 mijë familje shqiptare do marrin mbështetje direkte cash për të mbuluar atë normë të rritjes së çmimeve krahasuar nga 2021 në 2022. Pensionistëve u është indeksuar pensioni. 80% të faturës së energjisë elektrike sot e paguan qeveria.Të gjithë atyre që bërtasin hiqni TVSH e mallrave të shportës, pse? Nuk mund të trajtohej njëlloj ai që paguhet më pak. Ai që paguhet më pak do marrë mbështetje nga shteti. Ai që paguhet më shumë kësaj radhe të heqë dorë nga salltanetet”, deklaroi Balla për gazetarët, këtë të Hënë.
Ju si deputet mund të hiqni dorë nga salltanetet dhe nafta që paguajnë shqiptarët për ju?
Balla: Patjetër. Në aktin normativ të qeverisë dhe Kuvendit i është hequr një pjesë e madhe e buxhetit.
