Ish-Kryeministri nga Tepelena, atje ku zhvilloi takimin me demokratët, kërkoi bashkimin e të gjithëve, për tu përballur me regjimin e Edi Ramës.
Berisha tha se ky regjim ndërhyri duke prishur edhe rregullat në rradhët e opozitës, përmes mekanizmave, por sot ne po organizohemi me bindjen më të plotë për tu përballur me këtë regjim.
Ish-Kryeministri u ndal në rritjen e çmimeve, ndërsa tha se ndërsa në Ukrainv luftohet, çmimi i naftës është 1 euro më i lirë se në Shqipëri.
“Pse ne çdo krizë e përjetojmë më keq se çdo vend tjetër? Marrim pandeminë e Covid, qeveria thotë se kanë humbur jetën 3400 qytetarë, por në të vërtetë kanë humbur jetën 20 mijë qytetarë. Pse ndodhi kjo? Unë jam mjek dhe me bindje e them se nuk është faji i sistemit shëndetësor, por në Shqipëri bëhej çmos që të sëmurët të mos shtroheshin në spitale”, tha Berisha.
Ish-Kryeministri u shpreh se në Shqipëri urgjenca u shndërrua në një lloj seleksionuesi që i dënonte njerëzit duke i lënë në shtëpi pa mjekime, ndërkohë që në vendet e tjera, shtrimet në spitale shpëtuan jetë njerëzore.
Lidhur me krizën ekonomike, Berisha tha se Qeveria ka veshur lëkurën e qingjit dhe del në dyqane inspekton çmimet.
“Energjia në Shqipëri s´ka lidhje as me gazin dhe as me naftën. Në vitin 2021 janë prodhuar 8 mld e 900 mln kwh energji, ndërkohë që konsumi është 5 mld e 300 mln kwh. Me datën 22 korrik, kaskada e Drinit kishte nivelin më maksimal, por çfarë bënë? Hapën turbinat dhe shitën kwh me 40 euro, ndërkohë që në treg çmimet ishin 120 apo 130 euro”, tha Berisha.
Sipas tij, lufta ska lidhje fare me energjinë në Shqipëri, e cila prodhohet nga burimet ujore, por këtu problemi është vjedhja.
“Kjo që po ndodh nuk është nga lufta, as nga natyra, por nga vjedhja e qeveritarëve. Në Milano nafta shitej në Milano 1.7 euro, në Shqipëri nafta shkoi në 2.2 euro. Italia naftë nuk nxjerr, Shqipëria nxjerr 1 mln ton naftë. Këtu konsumohet 700 apo 800 mijë ton, atëherë është mundësia që nafta të futet te çmimet e rregulluara, sikundër energjia”, tha Berisha.
Sipas tij, importuesit e naftës janë të detyruar që të kenë rezerva 3 mujore dhe kjo sasi shërben për të rregulluar çmimet.
“Pse nuk ndodh kjo? Sepse këtu nuk e merr vesh se kush është aksioner në kompanitë importuese të naftës”, tha Berisha.
Ish-Kryeministri u shpreh se sa shpenzohen mbi 200 mijë euro për zyrën e një ministreje, apo miliona euro për udhëtime me charter privat, këto para ti jepen qytetarëve.
“Çfarë po ndodh sot? Qeveria shkon në markete me synimin për të fiksuar çmimet, por kjo krijon uri, zbras dyqanet dhe kjo është loja më e rrezikshme”, tha Berisha.
