Ish-kryeministri Sali Berisha nis sot turin e takimeve me synim bashkimin e demokratëve.
Në kuadrin e takimeve me bazën e PD në atë që pak muaj më parë u pagëzua me emrin “Foltorja”, sot ish-Kryeministri nis fazën e dytë, atë të takimeve me qëllim bashkimin e anëtarëve të PD dhe riorganizimin e strukturave.
Në dallim nga faza e parë e “Foltores” ku Berisha atakonte ish-kreun e PD, Lulzim Basha, lidhur me vendimin për përjashtimin e tij nga PD, pas shpalljes “non grata” nga DASH, në këtë tur takimesh që nis sot ish-Kryeministri pritet të ndalet në zhvillimet e reja, si dhe zbatimin e vendimeve të Kuvendit të 11 dhjetorit, ku më e rëndësishmja mbetet tashmë zgjedhja e strukturave të reja përmes parimit një anëtar, një votë.
Berisha është shprehur se gara do të jetë e hapur për çdo individ, ndërsa ka deklaruar se për herë të parë do të aplikohen edhe primaret.
Pas vendimit të së premtes që dha Gjykata e Tiranës, e cila njohu Komisionin e Rithemelimit si organ drejtues të PD-së, duke legjitimuar dhe Kuvendin e mbajtur në 11 Dhjetor, Berisha dhe anëtarët e Komisionit, kanë artikuluar mesazhe përbashkuese, ndërsa paralelisht kanë nisur edhe përgatitjet për zgjedhjen e drejtuesve të rinj të degëve.
Berisha do të ndalet sot në Jug të vendit ku pritet që të ketë takime me demokratët e Tepelenës dhe Përmetit.
“E dielë, në ora 11:00 Foltore me qytetarët e Tepelenës, dhe në ora 13:00 me qytetarët e Përmetit.
Ftoj të gjithë qytetarët të marrin pjesë”, shkruan Berisha në postimin e tij në rrjetet sociale.
Pas vendimit të Gjykatës, anëtarët e Komisionit të Rithemelimit, me në krye vetë Berishën, u rikthyen në selinë e PD-së, në ambientet e të cilës zhvilluar dhe mbledhjet e radhës, si dhe mbajtën deklaratë për mediat.
Vetë Berisha pati një takim me Gazment Bardhin dhe Enkelejd Alibeajn, të cilët një nga kushtet për bashkimin kishin moskandidimin e ish-kryeministrit për kreun e partisë, gjë e cila është përjashtuar kategorikisht si mundësi prej tij.
Berisha ka thënë se ai do të kandidojë, në respekt të të gjithë atyre demokratëve që i dhanë mbështetje në zgjedhjet e 6 Marsit.
