Mijëra vullnetarë nga vende të ndryshme kanë shkuar në Ukrainë për të ndihmuar në luftën kundër sulmit të forcave ruse. Shumë prej tyre janë ish-ushtarakë dhe kanë motive të ndryshme për t’i ardhur në ndihmë Ukrainës. Siç njofton nga Polonia korrespondentja e Zërit të Amerikës, Celia Mendoza disa nga këta vullnetarë po rikthehen tashmë në vendet e tyre.
Jetmir Hyseni është një 22-vjeçar shqiptar që iu bashkua vullnetarisht luftës në Ukrainë. Ai përjetoi sulmin me raketa të forcave ruse ndaj bazës ushtarake në Yavoriv, në pjesën perëndimore të Ukrainës. Jetmiri vuri në dispozicion të Zërit të Amerikës disa nga filmimet e tij.
“Ushtria ruse na sulmoi me mbi 30 raketa, patëm 35 të vdekur dhe 134 të plagosur”, thotë ai. Zoti Hyseni, i cili i mbijetoi sulmit me vetëm lëndime të lehta, kishte mbërritur në Ukrainë për t’u stërvitur dy ditë para sulmit. “I humbëm të gjitha kontaktet, nuk dinim ku të shkonim. Të gjithë vraponin. U futëm në bunker për t’u mbrojtur. Ishte një katastrofë e madhe”, thotë ai.
Zoti Hyseni u largua nga baza dhe kaloi kufirin nga Ukraina për në Poloni, ku iu desh të vendoste për të ardhmen e tij.
“Do shkoj në shtëpi tani. Dy ditë pasi mbërrita na goditën me 30 bomba. Nuk jam gati për këtë”, tha zoti Hyseni. Ish-ushtaraku kolumbian Martin Rios, 27-vjeç, thotë se iu bashkua vullnetarisht ushtrisë ukrainase për të ndihmuar në mbrojtjen e popullit të Ukrainës.
“Si gjithë ish-ushtarakët dëshiroja të kisha privilegjin t’i përkisja një kauze”, thotë ai. Edhe zoti Rios i mbijetoi sulmit ndaj bazës ushtarake në Yavoriv. Ai thotë se ndër grupin e madh me burra dhe gra nga mbarë bota ishin 10 spanjisht-folës të tjerë.
“Atëherë e kupton rëndësinë e trajnimit ushtarak dhe eksperiencës në luftime. Perezi fatmirësisht arriti të shpëtojë. Unë isha ndër të fundit që arritëm të largohemi dhe ndjeva goditjen e raketës që më hodhi në një pellg me ujë. Pastaj humba ndjenjat”, thotë zoti Rios.
Një tjetër vullnetar, Cesar Perez, gjithashtu filmoi gjatë sulmit që sipas zotit Rios zgjati për rreth gjysëm ore. “Është shumë e qartë që kjo nuk është hera e parë që kam qenë në një konflikt, por me të tilla përmasa? Kjo është diçka tjetër. Të bën t’i mendosh gjërat edhe njëherë”, thotë zoti Rios.
Një ish-ushtarak amerikan është ndër këta vullnetarë. Ai mbërriti në kryeqytetin ukrainas për të ndihmuar dhe ndau eksperiencën e tij në gjuhën spanjolle me Zërin e Amerikës. Për arsye sigurie, ai nuk preferon që të shfaqet fytyra e tij.
“Nëse nuk keni eksperiencë ushtarake, nuk duhet të vini këtu, sepse është e rrezikshme dhe mund të rrezikoni edhe njerëzit e tjerë që gjenden këtu”, thotë ai.
Dy vullnetarët që po kthehen në atdhe, thonë se megjithë dëshirën që patën për të ndihmuar, tani mezi presin t’iu bashkohen sërish familjeve të tyre. /Voa/
