Pas një sezoni plot halle, Partizanin e pret një punë e madhe në merkaton e verës. Kjo, jo vetëm për faktin se do të duhet të gjenden lojtarët e duhur për të rikthyer titullin, por edhe sepse një numër i konsiderueshëm futbollistësh janë në muajt e fundit të kontratës dhe nuk dihet nëse do të rinovojnë, teksa deri më tani nuk është shfaqur asnjë sinjal se klubi po negocion me ta.
Dy lojtarët më të rëndësishëm, të cilëve u skadon kontrata në fund të qershorit, janë kapiteni Alban Hoxha dhe sulmuesi Stenio Zhunior. Portieri tashmë është 34 vjeç dhe nuk premton për të ardhmen.
Gjithashtu në këtë sezon nuk ka treguar nivelin e tij të zakonshëm, pas disa gabimeve dhe dëmtimit, që e la jashtë fushave për më shumë se dy muaj.
Ai gjithmonë ka pasur një vend të veçantë te Partizani, për hir të kontributit dhe personalitetit prej lideri që gëzon, por faktet e mësipërme me siguri e bëjnë klubin të mendohet gjatë për rinovimin me gardianin. Në të tilla raste, duhet vullneti i të dyja palëve dhe mbetet për t’u mësuar nëse Hoxha dëshiron rinovimin gjithashtu.
Stenio Zhunior nga ana tjetër është një nga golashënuesit e ekipit dhe pikë e fortë e Mehmetit, pavarësisht ulje-ngritjeve gjatë sezonit.
Përveç tyre, duke parë aktivizimin shumë të paktë dhe rendimentin e ulët, thuajse të larguar janë Damçevski, Kote dhe Lika, të cilëve u skadon kontrata në mbyllje të këtij sezoni. Përveç tyre, Albion Marku, Mala, Kallaku dhe Liço janë të huazuar dhe do të duhet të kthehen në klubet e tyre.
Janë plot 9, lojtarët, që e mbyllin zyrtarisht me Partizanin dhe mund të mos vazhdojnë karrierën si “dema”. Kështu, është më shumë se një fakt se Partizani në verë do të pësojë revolucionin e radhës.
