Presidenti francez Emmanuel Macron tha se Franca, Turqia dhe Greqia do të kryejnë një përpjekje të përbashkët evakuimi për banorët në qytetin e rrethuar ukrainas të Mariupolit.
Duke folur në fund të samitit dy-ditor të BE-së në Bruksel, Macron tha se të tre vendet do të kryejnë një “operacion të jashtëzakonshëm humanitar” për të nxjerrë jashtë të gjithë ata që duan të largohen nga qyteti port.
Ai shtoi se do ta organizonin operacionin në “kushtet më të mira të mundshme”.
Macron përsëriti gjithashtu thirrjet që Rusia të braktisë armët në luftën e saj me Ukrainën, luftë e cila që dje bëri një muaj nga fillimi i saj.
“Objektivi ynë dhe obsesioni ynë është një armëpushim në të gjithë territorin (e Ukrainës)”, tha presidenti francez.
Shmangia e një krize energjitike ishte gjithashtu në agjendën e presidentit francez pas samitit që u fokusua në rritjen e çmimeve në këtë sektor.
Ai tha se vendet anëtare të BE-së do të punojnë për të ulur çmimet e energjisë elektrike dhe gazit.
Duke folur gjithashtu për rrezikun e një mungese të mundshme ushqimore, Macron njoftoi përpjekje të mëtejshme për të hequr “mosfunksionimet e tregut” dhe paralajmëroi se një mungesë ushqimore në mbarë botën mund të ndodhë në 12 deri në 18 muajt e ardhshëm nëse çështja mbetet e pazgjidhur.
