Ish-Kryeministri Sali Berisha dhe anëtarë të Komisionit të Rithemelimit shkuan sot pasdite në selinë e PD, pak orë pasi Gjykata e Tiranës, njohu me një vendim Kuvendin Kombëtar të 11 dhjetorit, i thirrur nga anëtarësia, ku edhe u shkarkuan nga të gjitha funksionet partiake Lulzim Basha dhe e gjithë kupola drejtuese e PD, përfshi edhe Gazment Bardhin si Sekretar i Përgjithshëm dhe nënkryetarët.
Berisha takoi për rreth 45 minuta Bardhin dhe Enkelejd Alibeajn, i komanduar si kryetar pas dorëheqjes së Lulzim Bashës, ndërsa nga ajo çfarë u deklarua publikisht ishte se palët ndodhen ende shumë larg një bashkimi, kjo për faktin e disa kushteve që konsiderohen të papranueshme nga ish-Kryeministri Sali Berisha.
Në konferencën për mediat, Berisha tha se nuk do të kishte asnjë pazar mes demokratëve, një deklaratë kjo e bërë për herë të parë nga ish-Kryeministri, ndërsa tha se Komisioni i Rithemelimit ka besim te Grupi Parlamentar. Berisha gjithashtu tha se së pari duhet të grupi parlamentar të funksionojë si një i tërë dhe përcolli disa mesazhe bashkimi, duke njohur edhe Enkelejd Alibeajn si Kryetar të Grupit Parlamentar. Deklarata e ish-Kryeministrit që publikisht hodhi poshtë mundësinë e një pazari, duke e bazuar gjithçka në votën e lirë, ngre dyshime se nga ata që konsiderohen si PD e selisë apo e vulës deri para vendimit të ditës së sotme, mund të ketë patur tentativa për një bashkim, bazuar te kompromiset.
Pak minuta më pas, Alibeaj dha një tablo tjetër, teksa nxitoi të deklaronte se ata që kishin shkuar në seli ishin të paftuar, ndërsa përsëriti disa herë se Berisha nuk ishte pjesë e Grupit Parlamentar të PD, dhe vendimi për përjashtimin e tij nga PD ishte në fuqi.
Alibeaj kujtoi shpalljen non grata nga SHBA për Berishën, kërkoi që PD të shohë nga e ardhmja, ndërsa u shpreh se i kishte kërkuar ish-Kryeministrit tërheqjen, duke i sjellë në vëmendje vendimin e Lulzim Bashës.
Por më parë, në të njëjtën karrige dhe sallë nga ku Alibeaj fliste me cinizëm mbi të paftuarit që kishin shkuar në selinë e PD-së, Sali Berisha do të deklaronte se nuk kishte ndërmend të tërhiqej, madje do të kandidonte edhe për postin e kryetarit të PD.
“Komisioni i rithemelimit e njeh grupin parlamentar. Unë i propozova Alibeajt që diskutimet të zhvillohen në këtë forum legjitim dhe ai u duk se ishte dakord me këtë ide.
Unë do të garoj në një sfidë të hapur, nuk vendos më Berisha për veten por vendosën ata që votiuan në 6 mars. Fati im është në dorë të antarësisë”, tha Berisha.
Alibeaj në anën tjetër duke anatemuar edhe vendimin e Gjykatës, la të kuptohet se nuk njihte Komisionin e Rithemelimit, ndërsa u shpreh bisedimet për bashkimin do të nisnin me deputetët e pezulluar.
Risia në ditën e sotme ishte fakti se mes Berishës dhe Gazment Bardhit e Enkelejd Alibeajt pati jo thjesht një shtrëngim duarsh, por një takim 45 minutësh, i cili të paktën publikisht ka zbuluar çështjet për të cilat palët ndodhen në pozicione krejt të kundërta.
