Banka e Shqipërisë vendosi të rrisë normën bazë të interesit me 0.5 për qind duke e çuar në 1 për qind. Kjo pritet të shtrenjtojë kreditë në lekë në Shqipëri dhe me gjasë do të rrisë edhe këstet e kredive për ata që kanë normë interesi të ndryshueshme.
Duke argumentuar vendimin për të rritur normën bazë, Guvernatori Gent Sejko, tha se goditja inflacioniste që ka shkaktuar sulmi i Rusisë në Ukrainë do të jetë më e fortë dhe më afatgjatë krahasuar me projeskionet e mëparshme. Inflacioni pritet të jetë i lartë dhe siëpr objektivit të Bankës së Shqipërisë të paktën deri në fund të vitit të ardhshëm.
Guvernatori i Bankës së Shqipërisë, Gent Sejko, foli mbi zhvillimet kryesore në ekonominë shqiptare për shkak të situatës së krijuar me rritjen e çmimeve për produktet dhe shërbimet.
Banka e Shqipërisë konstaton se ecuria e inflacionit në Shqipëri gjatë muajve të fundit është ndikuar nga rritja e çmimeve të artikujve ushqimorë, të naftës, dhe të kostove të prodhimit e të transportit. Në terma makroekonomikë, trendi rritës i inflacionit pasqyron rritjen e shpejtë dhe të qëndrueshme të kërkesës, rritjen e pagave dhe të punësimit, si dhe rritjen e shpejtë të çmimeve në tregjet ndërkombëtare gjatë dy tremujorëve të fundit. Këto të fundit kanë qenë të larta gjatë gjysmës së dytë të vitit të shkuar dhe janë vënë nën presion të shtuar nga tensioni gjeopolitik që shoqëron konfliktin në Ukrainë.
“Përditësimi i parashikimeve afatmesme tregon se ekonomia shqiptare do të vuajë pasojat e goditjes. Rritja e çmimeve në tregjet botërore dhe reduktimi i kërkesës së huaj, do të shoqërohen me norma më të larta inflacioni dhe rritje më të ngadaltë ekonomike krahasuar me vlerësimet tona të mëparshme. Megjithatë, vlerësimet e skenarit bazë sugjerojnë se ekonomia shqiptare do të vijojë të rritet gjatë vitit 2022 dhe në afatin e mesëm.
Po ashtu, projeksionet tona tregojnë se rritja ekonomike do të mbetet në territor pozitiv edhe në rast se goditja rezulton më e fortë se vlerësimet aktuale. Nga ana tjetër, goditjet e ofertës dhe qëndrueshmëria e kërkesës së brendshme pritet të pasqyrohen në norma më të larta inflacioni. Sipas skenarit bazë të parashikimeve, inflacioni do të luhatet rreth nivelit 5-6% për pjesën e mbetur të vitit 2022. Më tej, me qetësimin e pritur të tregjeve ndërkombëtare, inflacioni pritet të vijë në rënie gjatë vitit 2023 dhe të kthehet në objektiv në tremujorin e fundit të tij,” tha Sejko.
Sejko tha se çmimet do të vijonin të ishin të larta deri në vitin 2023 po ashtu nënizoi se inflacioni do të ishte në nivel më të lartë nga sa ishte parashikuar për dy vitet e ardhshme.
“Ekonomia shqiptare do të vazhdojë të rritet gjatë vitit 2022 dhe në vazhdim. Ky gjykim mbështetet në supozimin e mos-përshkallëzimit të mëtejshëm të konfliktit. Nga ana tjetër Këshilli Mbikëqyrës i Bankës së Shqipërisë vlerëson se inflacioni do të qëndrojë mbi objektivin edhe në 2 vitet në vazdhim.
Të dhënat që vijnë nga tregjet ndërkombëtare tregojnë se çmimet do të vazhdojnë të mbeten të larta edhe gjatë vitit 2022 dhe vitit 2023. Përtej kësaj situata ekonomia shquiptare ka shfaqur shenja të qarta rimbëkëmbjeje”, tha ai .
