Gjykata e Posaçme e Shkallës së Parë për Korrupsionin dhe Krimin e Organizuar ka vendosur pezullimin e gjykimit të procedimit penal ndaj të pandehurve Dritan Rexhepi, Gentjan Funiqi, Martin Bleta, Korado Keshteja, Artan Doçaj, Aldo Majnishta dhe Geraldo Marinit, të akuzuar për vrasjen dhe rrëmbimin e Jani Prengës, si dhe mbajtje pa leje e armëve luftarake, fshehje dhe asgjësim i kufomës, grup i strukturuar kriminal dhe kryerje e veprave penale nga organizata kriminale dhe grupi i strukturuar kriminale, për shkak se nuk kanë marrë dije personalisht për gjykimin.
GJKKO ka pranuar kërkesën e prokurorit për pushimin e hetimeve ndaj personave nën hetim Bajram Hajri, Leonard Hajri, Elton Hajri, Aleks Doçaj dhe Ardian Doçaj.
Po në gjykatë vazhdon hetimi ndaj të pandehurve Festim Bexhdili dhe Olsi Turja.
Rrëmbimi i Jan Prengës në Kamëz
Në dosjen e SPAK thuhet se urdhri për rrëmbimin e 49-vjeçarit është bërë për shkak se Astrit Prenga, vëllai i viktimës ka vjedhur një sasi prej 283 kilogramë kokainë në Portin Portsmouth, Angli.
Lënda narkotike i përkiste Rexhepit dhe Doçajt. Pasi Astrit Prenga nuk tregoi se ku e kishte dërguar kokainën, ata i rrëmbyen të vëllain, i cili nga dhuna humbi jetën.
Në pamjet e e siguruara nga dosja hetimore rezulton se trupi i 49-vjeçarit është nxjerrë nga automjeti Range Rover dhe është futur në një furgon të bardhë për t’u zhdukur më pas.
Ende nuk ka asnjë gjurmë apo informacion se çfarë është bërë më viktimën. Edhe pse janë mbyllur hetimet ende nuk janë identifikuar të gjithë personat që kanë qenë në garazhin e hotelit.
