Ish-kapiteni i kombëtares angleze të futbollit, David Beckham i dha kontrollin e llogarisë së tij në Instagram një mjekeje ukrainase, në qytetin e Kharkivit.
Mjekja Iryna, drejtuese e një qendre rajonale perinatale, e kaloi ditën duke postuar video në lidhje me punën që profesionistët e mjekësisë po bëjnë në mes të konfliktit.
Pamjet treguan të porsalindurit që po trajtoheshin dhe një bodrum ku pacientët duhej të zhvendoseshin për t’i shpëtuar bombardimeve.
Beckham, 46 vjeç, ka më shumë se 71 milionë ndjekës në Instagram.
Ish-ylli i ”Manchester United” dhe ”Real Madrid” tha se donte të nënvizonte “punën e mahnitshme që Iryna dhe punonjësit e shëndetësisë si ajo po bënin për të shpëtuar jetë në Ukrainë”.
“Ne ndoshta po rrezikojmë jetën tonë, por nuk mendojmë fare për këtë. Ne e duam punën tonë. Askush nga ne nuk do të dorëzohet”, tha Iryna.
Kharkiv është qyteti i dytë më i madh i Ukrainës dhe ka qenë objektiv i granatimeve ruse për më shumë se tre javë.
Beckham gjithashtu nxiti ndjekësit e tij që të dhurojnë për UNICEF, një agjenci ndihme e OKB-së për të cilën ai shërben si ambasador.
Ai dhe bashkëshortja Victoria kanë dhuruar një milion sterlina për të ndihmuar në financimin e punës së organizatës në Ukrainë.
