Kryetari i Partisë Demokratike Lulzim Basha shpalli të hënën dorëheqjen e tij nga drejtimi i opozitës pas humbjeve të njëpasnjëshme elektorale dhe presionit në rritje nga ish-kryetari Sali Berisha.
Basha e shpalli dorëheqjen në një fjalim të mbajtur para grupit parlamentar demokrat.
“…për të ndihmuar Partinë Demokratike dhe demokratët të lënë mënjanë ndasitë joparimore, i vetëdijshëm për peshën që mora mbi vete, për atë që e kam quajtur vendimin tim më të vështirë politik, kam vendosur të hedh një hap pas duke u dorëhequr nga detyra e kryetarit të PD,” deklaroi Basha.
Ai deklaroi se do të mbetet mbështetës i partisë dhe se do të punojë “për ringritjen e saj”.
Lulzim Basha hyri në skenën politike shqiptare në vitin 2005 si një fytyrë e re për Partinë Demokratike, pjesë e një platforme politike të krijuar nga Sali Berisha të quajtur “Komiteti për Orientimin e Politikave”. Basha, 48 vjeç, u bë ministër i Transporteve në vitin 2005 dhe u vu nën ndjekje penale për kontratën e ndërtimit të një autostrade 60 kilometra të gjatë të njohur si Rruga e Kombit, me konsorciumin amerikan dhe turk Bechtel Enka. Gjykata e Lartë e Shqipërisë i mbylli hetimet për shkak të skadimit të afateve hetimore.
Basha u bë Ministër i Brendshëm në vitin 2009 ndërsa fitoi mes debateve zgjedhjet për kryetar bashkie të Tiranës në vitin 2011. Në vitin 2013, pas dorëheqjes së Sali Berishës nga posti i kryetarit të partisë, Basha u zgjodh kryetar, pozicion që u ripërtërit në vitin 2017 dhe në qershor 2021, pavarësisht humbjeve elektorale në këto dy vite.
Në shtator 2021, Basha vendosi të përjashtojë ish-kryetarin Berisha nga grupi parlamentar për shkak të shpalljes së këtij të fundit nga Shtetet e Bashkuara si person i përfshirë në korrupsion madhor. Berisha, 77 vjeç, sulmoi në të gjitha mënyrat e mundshme Bashën ndërsa fati i tij duket se u vulos kur edhe një numër drejtuesish mbështetës të tij i kërkuan dorëheqjen pas rezultatit të dobët të zgjedhjeve të pjesshme për pushtet vendor më 6 mars./ BIRN
