Një 51-vjeçar u arrestua nga Policia e Tiranës, në kuadër të operacionit të koduar “Fati i lojërave”.
Në pranga ka rënë shtetasi Bardhyl Rakipi, që u konstatua duke ushtruar aktivitetin e lojërave të fatit në rrugën “Tre dëshmorët”.
Njoftimi i policisë:
Vijon operacioni policor i koduar “Fati i lojërave”.
Goditet një tjetër rast i aktivitetit të kundërligjshëm në fushën e lojërave të fatit nga Komisariati i Policisë Nr. 6.
Arrestohet në flagrancë 1 shtetas që ushtronte këtë veprimtari.
Specialistët e Seksionit për Hetimin e Krimeve në Komisariatin e Policisë Nr. 6, në vijim të punës për evidentimin dhe goditjen e veprimtarisë së kundërligjshme në fushën e lojërave të fatit, kanë evidentuar një rast të ushtrimit të kësaj veprimtarie, nëpërmjet lotarive sportive.
Në përfundim të veprimeve hetimore u arrestua në flagrancë shtetasi:
– B. R., 51 për veprat penale “Organizimi i lotarive të palejuara” dhe “Fshehja e të ardhurave”.
Gjatë kontrolleve të ushtruara nga shërbimet e Policisë, ky shtetas u konstatua duke ushtruar aktivitetin e paligjshëm të lojërave të fatit, nëpërmjet lotarive sportive, në një lokal në rrugën “3 Dëshmorët”.
Në cilësinë e provës materiale u sekuestrua një aparat celular që dyshohet se përdorej për ushtrimin e aktivitetit të lojërave të fatit.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale, për veprat penale “Organizimi i lotarive të palejuara” dhe “Fshehja e të ardhurave”.
