Arben Ristani, anëtari i Komisioni i Rithemelimit, e konsideroi si lojë aktin e dorëheqjes së Lulzim Bashës, ndërsa u shpreh se ai nuk mori asnjë përgjegjësi për gjendjen ku ndodhet sot Partia Demokratike.
“Ne nuk dëgjuam sot nga Basha që të thoshte kam përgjegjësi për humbjet, ndaj kam dyshime se është një lojë, duke lënë jashtë litarin, dhe kjo vazhdon pastaj me caktimin e Enkelejd Alibeajt si pasardhës në detyre të Bashës.
Lulzim Basha ishte i shkarkuar nga Kuvendi i 11 dhjetorit, vendi i certifikuar edhe me referendumin e 18 dhjetorit, çka do të thotë se kjo është një lojë e tij.
Faktikisht dhe juridikisht Basha ishte i mbaruar që në dhjetor, por me të vetën bën një lojë. Grupi Parlamentar nuk merr dot vendime lidhur me partinë, pasi nuk ka kompetenca statutore. Kush janë institucionet që kanë vendimmarrje në parti? Kryesia, Këshilli Kombëtar dhe Kuvendi Kombëtar. Nuk ka asnjë hapësirë që Grupi Parlamentar del me një rezolutë dhe vë kushte lidhur me organizimin e partisë”, tha Ristani.
Sipas tij, dorëheqja duhej dhënë para Këshillit Kombëtar, i cili më pas mandaton një pasues.
“Është një lojë e shëmtuar dhe karagjoze”, tha Ristani.
