“Sot Shqipëria është ende shumë larg në procesin e integrimit, me keqardhje vë re se ajo ka bërë shumë hapa pas në këtë drejtim”, u shpreh sot gjatë seancës parlamentare deputetja Albana Vokshi, duke theksuar se tashmë të gjithë shqiptarët janë të bindur se integrim të Shqipërisë në BE me Edi Ramën nuk ka.
“Cdo europian, cdo personalitet që shkel në Tiranë e lë të kuptohet këtë pavarësisht se, gjuha diplomatike nuk ua lejon ta thonë hapur.
Përtej sokëllimave të Kryeministrit që fajin e ka Europa se ajo nuk është ende gati, me shumë probleme të brendshme dhe nuk mirëpresin zgjerimin, përtej propagandës që nuk I pin ujë në institucionet e BE, Qeveria Shqiptare duhet të bëjë detyrat e shtëpisë. Ashtu sic Qeveritë e vendeve të tjera të Ballkanit po i bëjnë më mirë se ne.
Falë (keq)qeverisjes së Edi Ramës, Shqipëria është rast unikal: nga 3 kushte në 2013 (të gjithëve na vijnë në mëndje përpjekjet e Ramës e të tijëve për të minuar procesin e integrimit), kaloi në 5 e tani ka arritur në 15”, theksoi ajo.
Duke iu referuar raportit të fundit i Global Initiative Network, Vokshi u shpreh se ky raport e rreshton Shqipërinë në vendin e parë në Europë për prodhimin dhe eksportimin e cannabis dhe rrugë kryesore tranziti për drogërat e forta, si dhe të dytën në rajon për krimin e organizuar.
“Në raportin vjetor dërguar kongresit amerikan Departamenti Amerikan i Shtetit shprehet se Shqipëria mbetet e pambrojtur ndaj pastrimit të parave për shkak të korrupsionit, krimit të organizuar dhe sektorit informal, përfshi paratë që hynë nga jashtë. Organizatat kriminale shqiptare operojnë në Europë dhe Amerikën Latine.
Parlamenti Evropian në raportin e për progresin e Shqipërisë lidhur me plotësimin e kushteve për hapjen e negociatave thekson: “Akuzat për korrupsion vazhdojnë të minojnë besimin e publikut tek qeveria dhe institucionet demokratike në përgjithësi”.
Sipas raportit më të fundit të Transparency International, Shqipëria është pozicionuar në vendin e 110 në botë si vendi më i korruptuar në rajon, duke humbur 6 pozicione krahasuar me një vit më parë. Ndërkohë Kosova renditet në vendin e 87 duke bërë progres nga një vit më parë, ndërsa Mali i Zi pozicionohet në vendin e 64”, tha Vokshi.
Në vijim, deputetja u shpreh se krizat nxjerrin në pah fytyrën e vërtetë të cdo qeverie. Vokshi solli në vëmendje pandeminë, ku u shpreh se Shqipëria renditet e fundit në Rajon dhe Europë në çdo tregues.
“Jemi të parët vetën me rritjen e nivelit mesatar të humbjeve të jetës, dyfish i mesatares së BE dhe shumë më i lartë se vendet e rajonit”, tha Vokshi, duke shtuar se kjo ka ardhur si pasojë e keqmenaxhimit dhe abuzimeve me paratë publike duke bërë tendera sekretë.
Në vijim ajo theksoi se tashmë që pandemia e Covid-19 po mbaron, një epidemi edhe më e rëndë këcënon shqiptarët, ajo çmimeve stratosferike si rezultat i rrjepjes së shqiptarëve nga taksat e larta dhe monopoleve që qeveria kë dhënë për biznesmenët.
“Të gjitha me cmime në stratosferë. Çmime ngritur në mënyrë spekulante, ardhur në ndihmë nga terrori që mbolli edhe një herë Kryeministri. Qeveria është sjellë si spekulanti më i madh. Duke lejuar rritjen abusive të cmimeve, duke e nxitur atë, ka përfituar vetëm shteti nga të ardhurat më të larta. Qeveria si përfituesja më e madhe duhet të ketë arritur në 120% të realizimit të të ardhurave, por këto nuk I ka kthyer në mbështetje reale për qytetarët shqiptarë”, tha Vokshi.
Ndërsa i konsideroi të drejta protestat qytetare, ajo tha se ndaj një regjimi rruga e vetme që mbetet janë protestat dhe vetëm protestat.
