Deputeti i PD-së dhe njëherazi kryetar i Komisionit të Rithemelimit, Belind Këlliçi, ka përgënjeshtruar lajmet se PPE-të kanë dërguar në Tiranë një person të deleguar për dialog mes palëve në PD.
I ftuar në RTV Ora, Këlliçi tha se një gjë e tillë nuk është e vërtetë dhe se kjo është një çështje e brendshme e PD-së, pasi ka një debat shterues se cila është shumica e vërtetë në PD tashmë pas 6 marsit.
“Basha po gënjen deputetët sërish për të thënë se PPE kanë dërguar në Tiranë një person të deleguar nga ata që të gjejnë një rrugë të përbashkët dhe Berisha të tërhiqet për të fituar më shumë kohë. Ky është një lajm i rremë. Po ka ardhur një personalitet evropian që është në pension politik, por që ka ardhur i mandatuar vetëm nga Basha, dhe nuk ka lidhje me PPE. Kjo është një çështje e brendshme e PD-së, pasi ka një debat shterues se cila është shumica e vërtetë në PD tashmë. Ky debat ka marrë fund në 6 mars.
Nga sondazhet e kësaj jave, Basha rezulton 3-4% nga 13% që rezultonte në 6 mars. Javën tjetër apo deri në fund të muajit do të jetë më pak se 1%. Basha i përket së shkuarës dhe i takon tashmë PD-së që të mblidhet dhe të rigrupohet dhe të bashkohen të dyja kampet në një grupim të vetëm. Unë e shoh të vështirë që Basha të dalë nga ky realitet fals ku është futur. Mua më vjen keq që ndodhet në këtë gjendje sepse i kam dedikuar një dekadë. Basha i përket së shkuarës tashmë”, tha ai.
Gjithashtu Këlliçi theksoi se Basha nesër duhet të japë dorëheqjen që të mos mbetet si i vetmi kryetar i shkarkuar nga partia që rri në detyrë.
“Unë uroj që Basha nesër të japë dorëheqjen që të mos mbetet si i vetmi kryetar i shkarkuar nga partia që rri në detyrë. Nesër jam i bindur se do të ketë një kërkesë të madhe nga partia për dorëheqjen. 95% e deputetëve i kanë kërkuar dorëheqjen, por ai tha para mediave se nuk është kërkuar një gjë e tillë, por që Berisha të bëjë një hap pas. Kjo është një gjë absurde dhe personi më i dëmtuar është vetë Basha. Kryetar nuk të bën vula dhe logoja, por mbështetje e demokratëve”, shprehet Këlliçi.
