Ministri i Drejtësisë, Ulsi Manja deklaroi sot se Njësia Antikorrupsion ka kallëzuar penalisht 20 zyrtarë dhe ish-zyrtarë, si dhe për 75 zyrtarë ka nisur procedimi disiplinor duke filluar nga vërejtje deri në shkarkim nga detyra.
Manja tha në një konferencë për mediat, se “duke kaluar te veprimet konkrete të Njësia Antikorrupsion, janë kallëzuar penalisht në Prokurorinë e rrethit Pogradec 15 zyrtarë dhe ish-zyrtarë të cilët kanë lejuar dhe regjistruar një objekt brenda një shkolle në kundërshtim flagrant me ligjin. Bëhet fjalë për shkollën 9-vjeçare në fshatin Memlisht, kur është konstatuar ndërhyrje në regjistrat fizik të pasurisë së shkollës, regjistrim antiligjor i objektit brenda shkollës, regjistrim me certifikatë pronësie, përfituar nëpërmjet një lejë ndërtimi të marrë në kundërshtim me ligji. Për këtë janë kallëzuar zyrtarët përgjegjës. Rasti i dytë ka të bëjë me një denoncim i ardhur nga një qytetarë i zakonshëm i cili ka dhënë dijeni për disa legalizime të ndodhur në vitin 2019 e në vazhdim në Kadastrën e Sarandës, për zonë turizëm kanali i çupës. Menjëherë inspektorët e Njësia Antikorrupsion në ministrinë e Drejtësisë kanë nisur verifikimet dhe pas hetimeve intensive në Kadastrën e Sarandës është konstatuar legalizimi në kundërshtim me ligjin i dy objekteve me sipërfaqe 70 m2 dhe 81 m2. Për këtë janë kallëzuar penalisht zyrtarë dhe ish-zyrtarët në Kadastrës se Sarandës duke vazhduar me ish-drejtorin dhe vazhduar me specialistët përkatës”.
Ministri tha se përveç kallëzimeve penale janë propozuar për 75 zyrtarë masa disiplinore duke nisur me Drejtorinë Arsimore Parauniversitar ku sipas tij, kanë rezultuar një serish shkelje si dhe akte konstatimi fiktive.
“Në këtë kuadër janë propozuar nisja e procedimit disiplinor për një sërë zyrtarësh në Fier, Durrës, Lezhë, Korçë, Tiranë Gjirokastër, Vlorë, Sarandë, Berat dhe Elbasan. Po ashtu janë propozuar për masa administrative edhe për një seri punonjësish në institucione të ndryshme”, tha Manja.
