Gjykata Kushtetuese ka zbardhur vendimin për rrëzimin e kërkesës së Kuvendit për shkarkimin e Presidentit të Republikës.
Parlamenti i shkuar shkarkoi Ilir Metën, duke u mbështetur akuzën e saj në çështje të natyrës etike dhe jo për shkelje të rënda të Kushtetutës.
Vendimi u shpall në 16 Shkurt 2022, ku gjashtë nga shtatë gjyqtarët Kushtetues rrëzuan të gjithë pretendimet e Parlamentit.
Megjithatë, gjyqtarët kanë mbajtur qëndrime të ndryshme, sa i përket procedurës për shkarkimin e Metës.
Gjyqtaret Marsida Xhaferllari dhe Sonila Bejtja vlerësuan se vendimi i Kuvendit duhet shfuqizuar për shkak të mosrespektimit të procedurës parlamentare që lidhet me kohën e ngritjes së komisionit hetimor, si edhe të votimit me 2/3-at të Kuvendit të dalë pas zgjedhjeve të përgjithshme parlamentare, pra të 140 deputetëve.
Po ashtu, gjyqtarët Xhaferllari, Bejtja dhe kryetarja në detyrë, Vitore Tusha, ishin kundër qëndrimit se veprimtaria e presidentit është “partiake”.
Ndërkohë, shumica prej 4 anëtarësh e ka cilësuar detyrën e Kreut të Shtetit si partiake dhe e ka cilësuar qëndrimin e Metës gjatë fushatës zgjedhore si “shkelje”, por jo të rëndë të Kushtetutës.
Kjo ishte e vetmja shkelje që Gjykata Kushtetuese i atribuoi Ilir Metës, me shumicë të brishtë të votave.
Gjykata rrëzoi të gjithë pretendimet e tjera të Parlamentit. Kushtetuesja vlerëson se gjuha e përdorur nga Presidenti ka qenë agresive gjatë fushatës elektorale të 25 Prillit 2021. Por, sipas Gjykatës, gjuha agresive nuk përbën shkelje që pasohet me shkarkimin e Kreut të Shtetit.
Gjykata deklaron se nuk mund të diktojë mënyrën se si duhet të sillet ose komunikojë Presidenti në një kontekst të caktuar politik apo historik.
Po ashtu, Gjykata Kushtetuese rrëzoi pretendimin e Parlamentit se Ilir Meta ka shkelur Kushtetutën, duke ndërhyrë në fushatën zgjedhore, duke ndikuar tek institucionet e pavarura apo për cënim të raporteve me partnerët ndërkombëtarë.
Për Gjykatën Kushtetuese, mendimet apo propozimet e Presidentit, edhe nëse janë kritike, nuk konsiderohen shkelje Kushtetuese, përsa kohë nuk pengojnë veprimtarinë e asnjë institucioni tjetër.
