Vendi është përfshirë në një krizë ekonomike për shkak të rritjes së çmimeve. Qeveria pas një hezitimi vendosi të miratoi një paketë ndihme.
Lidhur me këtë, në një intervistë për MCN TV eksperti i ekonomisë Zef Preci e ka cilësuar si të pamjaftueshme këtë paketë, teksa shton se ajo paketë më shumë përfaqëson interpretime të disa hapave të parashikuara për buxhetin 2022.
Sipas tij, më e keqja ende nuk ka ndodhur dhe kur vjen puna te mallrat ushqimore kjo krizë evidenton dështimet e qeverisë me bujqësinë.
“Duhet pranuar që për momentin kemi një situatë e karakterizuar nga paniku dhe spekulimi. Për fat të keq qeveria si një rregullator mes biznesit dhe konsumatorëve me këtë paketë e ka renditur veten në anën e panikut të cilat nuk çojnë në ndonjë ndryshim të dobishëm, për shtresat në nevojë. Ajo paketë masash më shumë përfaqëson interpretime të disa hapave të parashikuara për buxhetin 2022. Minimumi jetik mungon në mjedisin shqiptar për fat të keq, por të thuash që do ju japim pensionistëve 3 mijë lekë të reja praktikisht është tepër pak dhe është ti japësh atë që i takon.
Në thelb mendoj se janë tepër minimale dhe nuk prekin përballimin e krizës sepse nuk janë vetëm çmimet e karburanteve por të gjithë mallrat dhe shërbimet janë cenuar nga kjo krizë. Për mendimin tim mendoj se më e keqja ende nuk ka ndodhur dhe këto mund ta përshpejtojnë negativisht këtë situatë. Kur vjen puna te mallrat ushqimore kjo krizë evidenton dështimet e qeverisë me bujqësinë. Sipas meje masat duhen parë imediate dhe kjo është njohja minimumit jetik sepse jetojmë në kohë të vështira. Njohja e minimumit jetik dhe korrigjimi i pensioneve, mbështetja e shtresave në nevojë, ka nevojë për referencë, ka nevojë për rishikim të buxhetit, shqetësimi më i madh duhet të jetë jo kriza në Ukrainë por që gjatë dekadës së fundit kafshët e prodhimit janë pakësuar, sipërfaqet e mbjella janë pakësuar”, u shpreh Preçi.
