Shqipëria mbetet ende e paqartë për një datë konkrete për hapjen e negociatave.
Kjo u bë e ditur nga Edi Rama, ne një konference për mediat nga kryeministria bashkë me shefin e diplomacisë europiane, Josep Borrell, i cili viziton Tiranën këtë të Martë – në kuadër të një turi vizitash në Ballkan.
Rama tha se Shqipëria i ka bërë detyrat për sa i përket çeljes së negociatave, por shtoi se ‘drita jeshile’ nuk jepet për shkak të vetos që Bullgaria i ka vendosur Maqedonisë së Veriut. Ai tha se është një “çështje e një bllokimi me dy vendeve, Maqedonisë së Veriut dhe Bulgarisë”.
Rama shtoi se “presim Qershorin” për të mësuar nëse do të çelen negociatat për Shqipërinë. “Presidenca franceze mund ta bëjë në Qershor, do ishte mirë ta bënte. Por dhe nëse nuk e bën, ne këtu jemi prapë”, u shpreh kreu i qeverisë.
Kreu i qeverisë u shpreh po ashtu se “ne jemi të vendosur deri në fund. Këta do detyrohen të martohen me ne. Është vetëm çështje kohe, ne duhet të rezistojmë”.
Që nuk ka ende një datë, e theksoi edhe Borrell, i cili shtoi se do vijojë të mbështesë çeljen e negociatave për Shqipërinë dhe Maqedoninë e Veriut.
Nga ana tjetër, Rama bëri me dije se situata në Ukrainë ishte një tjetër prej çështjeve të diskutuara me Borrell dhe ripërsëriti se Shqipëria është në anën e Ukrainës. “Shqipëria ka zgjedhur këtë pozicion si pozicionin e vetë natyral dhe jo se na e ka kërkuar njeri në Bruksel, Berlin, Paris, apo qoftë dhe Uashington. Ne jemi anëtar krenar të një aleancë të madhe si NATO. Dhe jemi po ashtu europianë krenarë për qenien tonë europiane dhe shqiptarë që shohin nga Europa derën e së ardhshmes sonë. Për të gjitha këto arsye jemi sot në këtë pozicion. Lufta në Ukrainë është një vijë ndarëse mes botës që ne njohim mirë dhe asaj të mungesës së të drejtave, të lirive, izolimit dhe dhimbjeve të imponuara nga një regjim autoritar. Bota që kemi sot mund të jetë shumë më e mirë se ç’është, por është më e mirë se ç’kishim. Dhe në Ukrainë luhet fati i kësaj bote që kemi”, tha Rama.
