Sot Gjykata e Arbitrazhit Sportiv mori vendimin e parë ndaj Rusisë, duke i kthyer përgjigje apelimit të Federatës së këtij shteti lidhur me sanksionet nga UEFA.
Kështu, CAS hodhi poshtë ankesën e Federatës Ruse të Futbollit kundër sanksioneve të UEFA-s, e cila pezulloi të gjitha ekipet dhe klubet ruse nga kompeticionet e tyre.
“Vendimi i kontestuar mbetet në fuqi dhe të gjitha skuadrat dhe klubet ruse vazhdojnë të mbeten të pezulluara derisa të vendoset ndryshe”, thuhet në komunikatë.
Sa i përket sanksioneve të FIFA-s, CAS njofton se një vendim i tillë do të vijë brenda javës.
Pas vendimeve fillestare të marra nga Këshilli i FIFA-s dhe Komiteti Ekzekutiv i UEFA-s, të cilat parashikonin miratimin e masave shtesë, FIFA dhe UEFA vendosën më 28 shkurt që të gjitha ekipet ruse, qofshin ato përfaqësuese kombëtare apo ekipe klubesh, do të pezullohen nga pjesëmarrja në garat e FIFA-s dhe UEFA-s deri në një njoftim të dytë.
Rusia ka bërë ankimime për të gjitha vendimet dhe sot pësoi humbjen e parë në këtë betejë të drejtësisë sportive.
