Avokati Adriatik Lapaj u shpreh se qytetarët kanë hyrë në ditën e 6 të protestave, ndërsa shqiptarët po protestojnë për dinjitetin dhe çmimet e larta.
“Nga situata ku qeveria tha se s’kemi gjë në dorë, arritëm që shteti paska të drejtë të ndërhyjë në treg”, tha Lapaj, në një intervistë për Syri Tv.
Për reagimin e Ramës i cili tha se qytetarëve duhet t’ju vijë turp që protestojnë kur luftohet në Ukrainë dhe i quajti pro rusë, Lapaj tha se s’kemi ndonjë luftë të shpallur por kemi një mik diku larg duke e mbështetur me pritjen e banorëve të atij vëndi nëse është nevoja.
“Lufta në një shtet shpallet me ligj. Kemi të drejtat tona. Nëse Rama mendon se jemi në nevojat e sakrificat e luftës, i kërkoj nga e gjithë flota e makinave shtetërore, mundemi të kursejmë dhe të heqim makinat e ministrave e me radhë. Do ishte shenjë e mirë nga ana e qeverisë”, tha Lapaj.
Sa i përket protestës, Lapaj tha se ka një pjesëmarrje të kënaqshme dhe beson tek kauza dhe angazhimi qytetar.
“Numrat janë të rëndësishëm në fakt në këtë vend. U treguan numrat ditën e shtunë, të dielën ishte masive. Këto janë protesta të përditshme. Të shtunën që vjen do marshojmë dhe mund të merret vendim që mos të largohen më pa u dhënë zgjidhje.”-tha Lapaj.
Sakaq, ai tha se grupet e interesit janë mbledhur, shtresat e ndryshme që preken nga rritja e çmimeve. Avokati deklaroi se një listë kërkesash do bëhen publike së shpejti.
“Një listë kërkesash, do bëhën publike shumë shpejt. Janë shumë objektive.”-tha Lapaj.
