Gjatë vitit 2022 Policia e Kosovës ka zbuluar dy laboratorë droge, vlera e materialit brenda së cilëve kap vlera milionëshe. Policia është në kërkim të laboratorëve tjerë.
Statistikat tregojnë se në Kosovë është rritur ndjeshëm numri i përdoruesve të narkotikëve, sidomos kokainës. Vetëm në tre muajt a parë të këtij viti, Policia e Kosovës ka zbuluar dy laboratorë të sofistikuar droge.
Reshat Murseli nga Policia e Kosovë thotë për RTV Dukagjinin se laboratorët e tillë të drogës është vështirë për t’u zbuluar. “Nga pamja e jashtme është e vështirë të vërehet se është një laborator. Kryesisht duken si objekte të mbyllura apo të pashfrytëzuara. Gjithashtu është shumë e vështirë të vërehet se në atë objekt po kultivohet diçka”, tha Murseli.
Por edhe gjatë vitit 2021 Policia e Kosovës ka arritur të zbulojë tre laboratorë droge. “Kemi zënë 845 bimë narkotike gjatë vitit të kaluar vlera e të cilave në treg do të kushtonte rreth gjysmë milionë euro. Ndërsa gjatë këtij viti vlera e bimëve të konfiskuara, e llogaritur me çmime të tregut do të kalonte një milionë e gjysmë euro”, shtoi Murseli.
Ai thotë se megjithatë kjo vlerë kalkulohet me çmimin e tregut të Kosovës, pasi sipas tij në tregun ndërkombëtar, këto substanca narkotike do të kushtonin shumë më tepër.
Prej shumë vitesh, Safet Blakaj me qendrën e tij “Labirint” zhvillojnë hulumtime në lidhje me përdorimin e substancave narkotike në Kosovë. “Përgëzoj Policinë e Kosovës për aksionet e fundit në Kosovë. Ka një trend që kanabisi të prodhohet edhe në objekte të brendshme”, deklaroi Blakaj.
Avokati Skender Musa thotë se Kosova pos një vendi transit, mund të bëhet edhe një vend prodhues i narkotikëve.
“Është rrezik i madh që Kosova të shndërrohet në vend transit të drogës, por rreziku akoma më i madh është se po shfaqen mjaft shumë laboratorë të drogës, duke pasur parasysh se jemi një vend shumë i vogël me një popullatë shumë të re që lehtë mund të bien nën ndikimin e drogës dhe të fillojnë të bëhen tregtarë të drogave dhe prodhues masiv të tyre”, deklaroi Musa.
Blakaj thotë se është shqetësuese se në katër pesë vitet e fundit ka një ngritje të madhe të përdorimit të drogës së llojit të kokainës. “Para katër viteve mosha e përdoruesve të kokainës në Kosovë ka qenë 35-45 vjeç. Derisa në vitin e fundit kjo moshë ka rënë nën 25-vjeç. Por ka shqetësime për raste sporadike që kokainën po e përdorin edhe të rinjtë e moshës 20-vjeç”, deklaroi Blakaj.
